Leiminin vanga chhe tel Ngopa
damdawi in siamthat dan tur en
Leimin vanga chhia Ngopa Community Health Centre (CHC) chu Thawhlehni khan Lengteng bialtu MLA, minister F Rodingliana’n a tlawh a, leiminin a tihchhiat belh lohnan a venna leh OPD building luah ngam loh sawn lailawk dan tur a enpui.
Saitual district bawrhsap Dr Lalngura Tlau leh Champhai chief medical officer Dr R Lalnienga te nen khawtlang hruaitute an kawm a, ruahmanna hrang hrang an sawiho. Thutkhawmah hian Ngopa CHC medical officer Dr Lalrintluangi’n leimin avanga harsatna an tawh dan a report a, leimin avang hian OPD building leh choka luah ngam lohin a awm tawh a, damlo en pawh casualty ward-ah neih rih a ni.
Minister hian geologist-ten lei chet dan an zirchian nghal tur thu leh a siamthat dan tur pawh NHIDCL leh PWD bakah National Health Mission Technical Wing lama mithiamten ruahmanna an siam thuai dawn tih a sawi a. Leimin avanga harsatna a thlen hma daih atang tawha Ngopa CHC building chu sak that tura ruahman a ni, tiin, sakthatna tur sum a awm tawh tih a sawi. Hun lokal zel tur thlir chungin khum 50 tal awm tura tih len a tul tih a sawi a. A tul chuan damdawi in awmna pawh sawn mai turin hmathlir thui tak nei turin khawtlang hruaitute leh official-te a chah a ni.
Bawrhsap leh CMO hian NHIDCL kawng laih avanga damdawi in ram min chungchanga hma an lak dan leh ruahmanna an siam dan an sawi bawk.
Lengteng bialtu MLA F Rodingliana hian Ngopa Playground cheithat mek chu a hmunah en nghalin, hnathawh a tlawh kual a, hnathawh chinah lungawi thlak a tih thu sawi. Contractor chu tha taka hna thawk zel turin a chah a ni. ‘Upgradation of Sport Infrastructure of Ngopa Playground’ hi North Eastern Council (NEC) funding niin hnathawh hun chhung bituk aia hmain kumin October-a zawh an inbeisei tih thawktute hian an lo hrilh a ni.
Leiminin vanga chhe tel Ngopadamdawi in siamthat dan tur en
