Kuthnathawktute tan leitha siamna lam buaipui nat a ngai a, chumi atan chuan bawng vulh tam a ngai tih ZPM treasurer C Laltanpuia chuan a sawi.
Thawhtannia an party office-a inkhawmah ZPM treasurer chuan party an din chhan chu policy a ni a, ZPM policy-ah chuan agriculture leh horticulture an nawr na dawn a, chumiin a kentel chu kuthnathawktute tana thil tha tak, leitha siamna buaipui a ngai tih a sawi. “Lei tha siamna khawl tha ber leh rang ber chu bawng vulh a ni a, leitha hi ram changkangte chuan an ngaihluin sum tlukah an ngai a, thlai ilo engkim mai hlawk zawka kan thar theihna tura bul pawimawh ber a ni,” a ti.
Bawng vulh uar a ngai chhan sawiin, “A ek hi leitha a ni a, a sa kan ei a, a hnute kan sawr bawk a, a vun thlengin tangkai taka hman theih vek a ni. Kan ram boruak hi a tha em em a, chuti chung chuan kan leilung erawh a tha tawk loa, kuthnathawktute mamawh lian ber pakhat chu leitha a ni. Bawng ek leitha kan sawngbawl dan pawh a tha tawk loa, dahro hian a chakna tam zawk a bo thin avangin ruahmanna tha zawk kan siam a ngai dawn a ni,” a ti.
Bawnghnuteah kan intodelh lo hle a, thlatin Mizoramin state pawn atangin bawnghnute lakluhna manah cheng nuai 800 vel kan seng ziah ang a ni tih C Laltanpuia hian a sawi. Thlatin Mizoramin state dang atanga archaw kan lakluhna man pawh nuai 500 vel a ni tih sawiin, “Vaimim atangin archaw an siam thin a, vaimim hmun hlawk tak siam turin leitha kan mamawh tho dawn. Kan terrace siam dan phung pawh tha zawk leh mumal zawka kalpui a ngai a, hmun zimtea siam loin zau tham taka neih a ngai; hmanrua leh khawl chi hrang hrang daihzai zawkin kan hmang thei dawn a ni,” a ti.
Sawrkarna an siam hunah chuan mipui duhdan a lal dawn a, mipui kaihruaitu tha tak tak an neih dawn avangin a thlamuanthlak hle tih ZPM hruaitu hian a sawi. Kuthnathawktute tan kawl a eng dawn a, awlsam si hlawk zawk bawk sia hma lak a nih theih nan an mithiamten ruahmanna an siamfel tawh tih a sawi a ni.
Leitha siam buaipui a ngai – ZPM treasurer
