District Level Monitoring Committee (DLMC) Kolasib chu an chairman, bawrhsap H Dolianbuaia kaihhruaiin Nilaini khan an thukhawm a. National highway laihzau leh siamthat meka Vairengte atanga Mualkhang inkar (package 3 atanga package 7) huamchhunga leivung paihna tur – Muck Disposal Plan, EPC contractor-ten an thehluh chu sawiho a ni.
EPC contractor-ten package tin atana leivung paihna tur hmun (muck disposal site) an lo duanlawk chu thlirho a ni a. Hmun thenkhat chu an pawmpui nghal a, hmun thenkhat erawh uluk zawka enfiah that tura tih a ni. Leivung paihna hmun thlan felah hian hriattirna ‘signboard’ tar ngei ngei turin tih a ni bawk.
DLMC member secretary, divisional forest officer chuan rawtna siamin, leivung paihna hmun reng rengah leivung paih hmain a venna (protection wall) siam hmasa phawt thin turin contractor-te a hrilh a. Mizoram Pollution Control Board atangin leivung paih fimkhur loh hian lui leh tuihna a ti nuin a tihchhiat theih avangin fimkhur taka leivung paih turin contractor-te chah an ni.
Thutkhawmah hian village council aiawhten contractor-te fimkhur tawk loh rah chhuah, leivung paih avanga harsatna an tawh thin dan an thlen a. DLMC chairman chuan contractor-te chu fimkhur taka hna thawk tur leh ruahmanna siam (muck disposal plan) anga a hmun ruatsaah leivung paih turin a hrilh
Hei bakah hian kawng siamtute hnathawh dan thlirho nghal a ni a. CALA (competent authority for Land Acquisition) in mipui hnen atanga ngenna leh vuivaina a dawn thinte sawichhuakin, hmalam hunah uluk leh fimkhur zawka hna thawk tawh turin contractor-te hriattir leh ngen an ni.
Leivung paihna tur ruahman ho
