Lemchan khawvelah Ariana Grande hmalam hun a êng
Rimawi khawvelah a hlawhtling tawh hle a, hmeichhe zaithiam zinga langsar leh huhang nei lian ber te zingah a tel daih tawh, tunah chuan lemchan lamah pawh Ariana Grande hmalam hun a êng leh ta khawp mai, film puitlinga role pawimawh a channa hmasa ber ‘Wicked’ a hlawhtling hle a, he film-a Glinda lema a channa avangin ‘Rising Star Award’ a dawng dawn e.
Cynthia Enrivo nena an chan dunna ‘Wicked’ film chu November ni 22 khan cinema hall-ah an chhuah tan a, US box office-ah No.1 te pawh a kai a, he film hi an tlangzarh hma hauh pawhin Ariana Grande performance chu eng award emaw tak dawng thei ngei tura an rin thu lo sawi lawk an awm nual tawh a, a thleng dik tan mek!
Palm Spring International Film Award chuan Ariana Grande hi ‘Rising Star Award’ dawng turin an tlang. He award hi Terrence Howard (Hustle & Flow), Anna Kendrick (Up in the Air), Scarlett Johansson (Lost in Translation) leh Jennifer Lawrence (Winter’s Bone te pawhin an lo dawng tawh a, award dawngtu te hi lemchan khawvelah an hlawhtling chhunzawm khawp mai a, Grande pawhin rimawi khawvel mai bakah lemchan khawvelah pawh huang a zauh thei ngeiin a rinawm. He award hi January ni 3, 2025-ah an sem ang.
Palm Spring Interational Film Award chuan thuchhuah siamin, “Wicked-a Glinda a lantir danah Ariana Grande lemchan thiamna hian a tawn sân dan leh rimawi lama a talent neih thatna nena a inchawih mawi dan hi a rawn lantir hneh em mai a. Ariana hi khawvel huapa performer ropui a ni, film lama role lian thama a channa hmasa bera rawn hnehsawh ngal em em a a ni a, a talent ngah zia leh that zia hi a rawn pholang chiang a ni. A lemchan zinkawngah chawimawina a la dawng dawn chauh tih a chiang nghal hle mai. Keini pawhin Ariana Grande nenah Rising Star Award kan hlan tur hi ka phur takzet a ni,” an ti.
‘Wicked’ hi Jon M. Chu direct niin, Ariana hi Cynthia Enrivo, Jeff Goldblum, Michelle Yeoh leh Jonathan Bailey te nen an changho a, he film hian cinema hall ticket hralhna atangin US-ah dollar maktaduai 275.8 la lut tawhin, khawvel huapin dollar maktaduai 372.9 a la lut tling tawh bawk.
Palm Spring Interational Film Award-ah hian Timothee Chalamet pawhin ‘A Complete Unknown’ film a Bob Dylan lemna a channa avangin chairman’s award a dawng dawn a, Emilia Pérez changtute- Karla Sofia Gascón, Zoe Saldaña, Selena Gomez leh Edgar Ramírez leh director Jacques Audiard ten vanguard award an dawng bawk ang.
Lemchan khawvelah Ariana Grande hmalam hun a êng
