Mizoramin ram ro tling ‘asset’ kan neih hlut berte zinga pakhat Lengpui Airport enkawl hna, midang (Indian Air Force) kuta hlan tumna kal mek chu, tun laia Mizoram titi luahtu ber pakhat a ni awm e. Hemi chungchang ngaihtuah tura a bika ruat ‘Working Committee on Lengpui Airport’ report thehluh chu October 16, 2024-a Cabinet meeting chuan a thuphungin a pawm tawh a. Cabinet thutlukna bawhzui zel tura Working Committee din thar leh chuan Cabinet thutlukna hi an bawhzui a. He Working Committee hian Indian Air Force (IAF) hnena Lengpui Airport hlan dan tur chungchang zir chiang a, IAF te nen indawr zui zela draft memorandum of agreement thlenga ruahmanna mumal tak siam tura tih an ni a, thla thum chhunga report thehlut tura tih a ni.
Midang kuta Lengpui Airport hlan hi NGO Coordination Committee leh political party hrang hrangte chuan an duhloh thu an auchhuahpui tawh a. Social media lamah pawh Lengpui Airport kaihhnawiha thil chinchang hre deuh tura ngaihte kawmna hrang hrang thlir tur a awm nual bawk a, sawrkar tanfung thlawptu an vang hle a ni.
Hetia han thlir hi chuan, mipui tam zawk daih hian state enkawlna hnuaia Lengpui Airport hi kalpui zel a, international airport ni thei tura tihchangtlun chhoh zel hi an duh tih a chiang a. Kan hma lam hun thui tak thlir chuan, tun atanga international airport ni thei tura hmathlir lo neih lawk hi chu tihmakmawh a ni. Khawvel hi a la awm zel chuan engtik ni-ah emaw chuan, thenawm state-a international airport pan kher ngai lova mahni tualzawl atanga foreign ram pan ve nalh theih hun hi a la thleng ngei ang tih a rinawm.
Leiba ngah tih vanga airport enkawl zo loa inngai a, ram venhim hna thawktu (Defence) lam daih enkawl tura dah tum hi, chuti lawka thutlukna han siam hnan mai atan chuan a pamhmai dawn hle a. Defence lam chuan ram venhim lam an ngaih pawimawh ber dawn avangin, security strategy lam hawiin lengpui airport thuamthat a nih pawhin raldo thlawhtheihna tinzawn a ni tawh ang a, a sirah khualzin thlawhna chu a hminga a kal ve tek tek chuan an duhtawk mai ang tih a rinawm. Chu chuan airport thar dang siam duhna a hring chhuak ang a, a bul atangin kan tan tha leh dawn tihna a ni a, mi hnungah kawl ek kan thai kan thai leh mai dawn tihna a ni awm e.
Airport enkawl harsat dan leh midang kuta hlan a that zawkna ‘comparative statement’ te hi mipui hmaah langtlang takin sawrkar hian tarlang thei se, hnam hnuk khawih thil takmeuh a nih avang hian zau zawka sawiho hi a phu takzet a ni.
Lengpui Airport
![](https://theaizawlpost.org/wp-content/uploads/tap_logo-min-large.jpg)