Huna Kawlni Kawlvawm
Mizoram Sorkar tharin Lengpui Airport chu Airport Authority of India kutah hlan a tum a. Hemi avang hian Social media WhatsApp, Facebook etc ah sawi leh chai a hlawh hle a, tapchhak zawl expert lamin an sawi huaiin an sawi nasa zual niin a lang. India ram state dang AAI kuta awm sum an hloh nasat avanga AAI-in mimal, sumdawng company kuta a hlan (disinvestment) chungchang kum hnih kal tawha ka ziak hi lo chhiar phawt teh u. In veng deuh hawk ang.
October 11, 2021:
PTI-in a report danin Gopinath Bordoloi International Airport Guwahati enkawl hna chu kar hmasa Zirtawpni (8/10/21) atang khan Adani Group kutah Airport Authority of India (AAI) chuan a hlan fel a ni ta. Adani group hian hengah te hian mawh a phur ang, chung te chu :
Operations: Management: Development
India hmar chhak airport zinga lian ber leh changtlung ber hi Ramesh Kumar, Airport Director of the Airports Authority of India (AAI) aiawh leh Utpal Baruah, Adani group Chief Airport Officer,(new airport operator) Zirtawpni zan tlai tawh takah khan a hlan tih press statement chuan a tar lang.
Kum 2018 atang khan Govt of India chuan airport enkawl hna mimal & sumdawng kuta hlan tur a tih zingah Guwahati airport pawh hi a tel a, chung airport 6 zing ami te chu hengte hi an ni — Ahmedabad, Lucknow, Mangalore, Jaipur, Guwahati, Thiruvananthapuram.
Airport privatisation hi kum 50 chhung atan a ni a, a huam tur chu operations, management and development (OMD) a ni.
Adani Enterprise Limited hian heng airport paruk lilam hi an chhang hlawhtling vek (successful bidder for all the six airports) a ni .
Concession agreement hi kumin January 18 khan AAI (Airport Authority of India) leh Adani Enterprise Limited te chuan New Delhi-ah an lo ziak fel tawh a ni.
October 8,2021 Zirtawpni atang khan Lokpriya Gopinath Bordoloi International Airport, Guwahati enkawl hna zawng zawng (operation, management and development) chu airport operator kutah a lut fel ta — Adani Guwahati International Airport Limited (AGIAL) — tih a ni tawh ang tih press statement chuan a tar lang .
An lak tan tirh kum thum chhunga enkawl hna chu Airport Authority of India hnuaia thawktute hian new airport operator hi an vilpui ang.
Ministry of Civil Aviation hnuaia Airport Authority of India (AAI) enkawl airport 137 zinga 102 te chuan FY20 chhung khan hlawkna hmu phak loin an hloh (loss) a, an hloh belh khawm hi Rs. 1,646.66 crore a ni. Hloh nasa zual airport te chu : Bhopal 65.46 crore, Varanasi Rs. 61.14 crore, Aurangabad Rs 58.71 crore, Imphal Rs 58.63 crore te a ni.
Ministry of Civil Aviation hnuaia AAI enkawl airport te, a enkawlna senso leh a thawh chhuah inphu lo leh hlawk lo (non performing airports) te hma lam hun a thlir a, beisei sang tak a neih loh leh hloh zel tura ngaih te chu mimal kuta hralh (privatise) turin thu tlukna a chhuanlam a siam ta a ni.
(Business Line 16/3/21)
HEI VE THUNG HI
1. Ministry of Civil Aviation hnuaia Airport Authority of India (AAI) tih dan ang hian Mizoram airport awm chhun Lengpui airport hi Mizoram Sorkar hian balance sheet, profit and loss account a nei ang em?
2. Mizoram State Sorkar hian airport enkawl hi sum siamna hmanrua atan em ni a duh chhan hi ni ang em?
3. Govt of India/AAI pawhin airport hlawk lo enkawl zel hi thei leh tlin an intih tawh loh lai hian Mizoram state te thawh chhuah nei lo hian kan tlin zel ang em?
4. AAI kut Lengpui Airport hi Mizoram Sorkar hian hlan tum se, AAI hian an la duh kher ang em?
5. AAI tehfung hian teh ni se, Lengpui airport hi non performing airport a ni chiang khawp ang, kum tin Rs 20 crore chuang hloh zar zar nia hriat a ni.
6. Kum khata Rs 20 crore hloh anga chhutin ni khata hloh zat chu Rs 5,47,945.20 a ni. (Rs 20,00,00,000 ÷ 365 days = Rs 5,47,945.20).
Sources : Business Standard
October 8, 2021
Business Line
March 16, 2021