Lengpui Airport tlan kawng siamthat ran loh chuan license tawp hnai dawn

Lengpui Airport tlan kawng siamthat
ran loh chuan license tawp hnai dawn
Lengpui Airport chu tlan kawng a that tawk loh avangin a enfiahtu lam chuan siamthat thuai a nih loh chuan, thlawhna tum tir theihna ‘license’ chu thla thum hnu velah tihtawp mai theih a ni tawh tih sawi a ni.
Lengpui Airport hi Inrinni khan MNF Legislature Party (MLP) chuan an tlawh a. Civil Aviation hotuten lo dawngsawngin, an inkawmnaah Lengpui Airport-a thlawhna tlan kawng (runway) chu Central Road Research Institute (CRRI) chuan a tha tawk tawh lo an ti a. Siamthat thuai a nih loh chuan an licence cancel thlengin hma lak theih a ni tih an hrilh thu sawi a ni. Hei vang hian Mizoram sawrkar chuan kumin February 5 khan runway siamthatna atan hian cheng vaibelchhe 80 a ruahman fel tih sawi a ni.
Airport hotute sawi danin, tunah hian Lengpui Airport thlawhna tlan kawng hi a that zawng tehna PCN (Pavement Classification Number) 36 a ni a, hei hi PCN 55-a tih san tum a ni. Hma an la tan tawh a ni. CRRI hotute sawi danah, tuna airport runway hi thlawhna chetsual hlauhthawnawm a nih avang leh mipui tan a him tawkloa an ngaih avangin siamthat ngai an ti a, siamthat a nih loh chuan thla thum hnu velah chuan thlawhna tum tlak lohnaa ngaiin license tihtawp lailawk theih a ni tih sawi a ni.
Lengpui Airport hotute chuan, airport ram huam chin hi teh thin a ni a; kum 2022-a a zau zawng tehnaah bigha 1997-a zau a nih laiin, kum 2024-a an tehnaah bigha 1724.78 a ni tawh tih an sawi.
MLP leader Lalchhandama Ralte chuan, ZPM-in sawrkarna a chan hnu lawkah Lengpui Airport chu midang kuta hlan an rel nghal tih a sawi. Chief minister Pu Lalduhoma Delhi-a a kal hmasak bera a lo haw hnu ah Lengpui Airport chu AAI (Airport Authority of India) hnenah emaw Adani Group ah emaw hlan tum a ni ang, tiin a sawi tih sawi chhawngin, hemi bawhzui tura sawrkarin Working Committee a chuan Indian Air Force (IAF) hnena hlan a rawt ta daih a, cabinet-in a pawm zui ta tih a sawi.
“AAI leh Adani Group chu thuhran nise, sawrkar hian IAF kutah pe ta se, vawiina kan thlawhna thlawh ang hian a thlawk reng thei angem? Reilote-ah airport sir leh sirah hian indo thlawhna thuhrukna tur ‘Blast Pens’ siam a ngai anga, missile dahna tur pawh ruahman a ngai ang. Indo hmachhawn thei turin airport hi an ruahman a ngai dawn a ni,” a ti.
India rama IAF enkawl airport engemawzat a awm a, chu’ng ho than dan, mipuiin harsatna an tawh dan hmuhin, Mizoram sawrkar ruahmanna siam chu MNF Legislature party chang ni lo, MNF party, Congress party leh NGO zawng zawng pawhin an duh loh a ni a, Mizoram sawrkar chuan ngaihtuah nawn se, an tilui a nih chuan ram mipui pawi an la khawih dawn tih MLP hruaitu hian a sawi a ni.
Chief minister hlui mual liam ta Brig. T Sailo leh Pu Laldenga bakah la dam Pu Lal Thanhawla leh Pu Zoramthanga ten airport atan theihtawp an lo chhuah tawh a, kum 25 chhung an enkawl a, tuna sawrkarna fawng chelhtu ZPM-in kum khat awrh chauh a enkawl hman tiha hralh an tum ta mai chu hriatthiam har a tih thu leader of oppostion Lalchhandama Ralte hian a sawi a. MNF sawrkar lai khan tuna runway sirah hian runway dang siam tumin hma an la a, tun ami ai hian a thui thei zawk tih PWD engineer-ten an finfiah a. Sawrkar laipuiah DPR thehluh a ni tawh a, he runway hi tih puitlin a nih chuan international airport neih pawh beisei a nih laia IAF pek tum a ni chu a hrilhhai thlak a tih thu a sawi bawk.