Adviser to chief minister TBC Lalvenchhunga kaihhruaina hnuaia din Working Committee on Lengpui Airport chuan Thawhtanni khan chief minister Lalduhoma hnenah an thil zirchianna report an thehlut.
Chief minister chuan, hun tiam chhunga report fel taka an peih hman avangin a lawm tih a sawi a. An report atangin an thawhrim zia a lang a ni, tiin, Working Committee hnenah lawmthu a lo hrilh a ni.
Committee chairman chuan sawrkarin hun tiam a pek chhungin report an peih hman a, a thehluh erawh tunah an ruahman ta tih a sawi a. Working Committee member secretary, GAD commissioner & secretary Vanlaldina Fanai pawhin Committee hian airport enkawl zel dan turah thutlukna a siam loa, thutlukna chu Council of Ministers kuta awm a ni, tiin, Committee chuan zirchian theih ang ang chipchiarin an buatsaih tih a sawi a ni
Report thehluhnaah hian Aviation director Lalrohlua chuan an zirchian dan a sawifiah a ni.
Lengpui Airport zirchianna report CM hnenah thehlut
