Lengpui ram hralh danah MNF leh
ZPM mawhphurhna a inchen chiah
– PC Laltlansanga
Lengpui Airport bul ram hralh chungchangah MNF leh ZPM chu inmawhpuh bik tur an awm loa, an mawhphurhna a inchen chiah tih Congress hruaitu PC Laltlansanga chuan a sawi.
Thawhtannia Congress Bhavan-a inkhawmah MPCC general secretary PC Laltlansanga chuan, 2025 Febuary 21-ah chief minister-in Assembly House-ah Lengpui Airport bul ram hralh tum a dem hnu lawkah, ZPM sawrkarin ramhuai speed-in file a kaltir a, hun reilote chhunga payment an pe leh si chu thil mak tak a ni, tiin, “India rama compensation file kal chak ber a nih a rinawm. Heti taka rang leh chaka file a kal theih chhan hi cheng vaibelchhe 117 a ni a. Chuvangin he sum hi thamna sum a ni,” a ti.
Lengpui ram lei leh hralh chu MNF sawrkar lai khan tifel hman nise tute emaw chuan an hlawkpui viau dawn, tiin, tuna chief minister-in khatihlaia CM, Revenue minister leh chief secretary hming a sawi chu rem leh rem loa hmai phihna tur zawnna a ni ber tih a sawi a ni.
“Pu Lalnunmawia Chuaungo chief secretary a nih lai khan Air vice marshal chuan lehkha thawnin hma la turin a rawn ngen a. Chief secretary hian notesheet-ah airport bulah ni loin Lunglei district-ah ram zawn nise tiin file a lo ziak a, chu bak chu IAF hnena ram hralh chungchangah Pu Lalnunmawia Chuaungo hian kuthnu engmah a nei lo,” a ti.
Lengpui Airport bul ram lei leh hralhah ZPM an sawrkar a, a tifeltuah an tang ta zawk tih MPCC hruaitu hian sawiin, “Vbch 17 dawngtu in ka ta tur vek a ni lo, state leh central lamah mantang pek tur ka ngah lutuk a ti a. Tu nge hausakpui ta hi chhui a ngai. Duh nise ZPM khan MNF sawrkar hma lo lak tawhna cancel turin hun a ngah lutuk. MNF sawrkar laiin CM fachuam Kamrula leh a unaupa in Lengpui Airport vbch 35 sengin an cheitha a. Unaute sum kawltu CM leh vbch 117 nena rinzawn CM hi an inang reng a ni.
Congress mipui chu Zoram siamtha turin an bei a la dawng loa; NGO, kohhran hruaitute, sumdawng leh sawrkar hnathawk rinawm tak takte pawh an la beidawng lo tih PC Laltlansanga hian a sawi a. Bana Kaih policy hnuaiah thalaite eizawnna tur loan a pung awmlo pe in, sawrkar quarantor-a a tan tur thu an sawi a; tunah chuan CM-in a fapa hmingin vbch.15 loan a lo la, tiin, “Zoram thalaite hmakhalhin Hand holding hmangin a fapa a lo khai chhuak hmasa ber niin a lang,” a ti.
Lengpui ram hralh danah MNF leh ZPM mawhphurhna a inchen chiah – PC Laltlansanga
