Lengpuiah ran chaw siamna tur din a ni a, Nilaini khan AH & Vety minister Er. Lalrinawma’n a hawng.
Special Assistance to State for Capital Expenditure (SASCE) 2020- 2021 hnuaiah cheng nuai 465 hmanga din a ni a. He project-in a tum ber chu, ran vulhtuten man tlawm zawka ran chaw an lei theihna tur kawng hawnsak, engtik lai pawha ran chaw tha leh man tlawm lei tur awmtir reng, ran chaw chawkluhna man tihniam tura Sairang/ Sihhmui rel station hnaivaia Feed Godown din bakah company lian zawk hnen atanga tum khata ranchaw tam tak lakluh theihna kawng sialte a ni.
AH & Vety minister chuan kan ramah ran vulh a hautak em em chhan chu zaa 70 vel ran chaw manah kan hman thin vang a ni, tiin, ran chaw man sang zel ven nana hetiang project-a enkawl department-in a siam chu lawmawm a tih thu a sawi. “Tunlaia ran natna zaa 70 chu mihringah pawh kan kai ve theih a nih avangin kan ran vulhte an hrisel theihna’n theihtawp chhuaha kan enkawl a pawimawh a, an hrisel theihna’n chaw tha hmanga kan hrai puar a pawimawh hle a ni,” a ti.
SEDP hnuaiah sawrkar chuan ran vulh a ngaipawimawh a, beneficiary ngah ber an nih hial thu sawiin SASCE project hnuaiah ran chaw tha, man tlawm zawka ran vulhtuten an hmuh theih ngei a beisei tih a sawi bawk.
Lengpuiah ran chaw siamna
