LESDE Kut-ah kuthnathawktu leh hna
zawng mek mi 200 chuang an inziaklut
Labour Employment Skill Development & Entrepreneurship (LESDE) department buatsaih LESDE Kut 2026 chu Inrinni khan Aizawl Lammualah khar a ni.
Kut chhung hian public sector unit 5 – Power Grid Corporation of India Limited, National SC/St Hub Guwahati, Department of Food technology Mizoram University, Mizoram Rural Bank, Food Corporation of India atangin seminar, State Level Vendor Development Programme neih a ni a. Pradhan Mantri National Apprenticeship Promotion Scheme (PM NAPS) pawh neiin, establishment 20 vel leh apprentice 100 chuang an inziaklut.
Kut ni thum ni atangin intihlimna hun hman tan a ni a, skill development atanga designer pali – Valkia, Mahlui, teremi leh tluangpuii Hmar kutchhuak Mizoram-a model-ten pochhuah sakin, live concert neih a ni.
LESDE Kutah hian stall 162 hawn a ni a, heng zingah hian Mizoram pawn atangin stall 11 hawn a ni. Chhinchhiah chinah Kutah hian kuthnathawktu leh hna zawng mek mi 234 sawrkar scheme hrang hrang hnuaiah an inziaklut a, mi 28-in hna an hmu a, free health check-up mi 1000 chuangin an ti a; stall hrang hrang inhralh zat chu cheng nuai 35 chuang a ni.
Kut khar ni hian district tina skill development leh entrepreneurship lama mi hlawhtling thlanchhuah hnenah District Skill & Entrepreneurship Award 2025-2026 hlan an ni.
Kharna hun hmanpuitu LESDE minister Lalnghinglova Hmar chuan, LESDE Kut chu kuthnathawkte, thiamthil neite leh hna zawng mekte puala buatsaih a ni, tiin, an department inhmelhriattirna leh sawrkar hnuaia hamthatna hrang hrang an dawn theih pholanna a ni tih a sawi.
LESDE chu department lian ni lo mah se, central ministry 5 – Labour, Skill Development & Entrepreneurship, External Affairs leh Corporate Affairs nen indawrin an thawkho tih a sawi a. Mizoram-in entrepreneurship leh thiamthil zir kawngah hma a sawn viau rualin, thil tha zawk leh danglam zawk ngaihtuah chhuaka siam chhuah tum zel turin hetiang lama inhmangte a fuih.
LESDE Kut-ah kuthnathawktu leh hna zawng mek mi 200 chuang an inziaklut
