Hmanni deuh lawka thi ta, One Direction member hlui Liam Payne-a dam laia an hla record, a tihchhuah hman tak loh chu online lamah pho chhuah a ni. Mahse, he hla hi release hun sawn leh a ni.
Fans in an la hmuh loh video clip hi Grammy winner Sam Pounds chuan khawvel hmuh theih turin a pho chhuak a. A hla hming chu ‘Do No Wrong’ tih a ni. Tun thla tira Liam a boral thut hmaa an siam dun a ni.
‘Do No Wrong’ hla hi tun kar hian tihchhuah tura ruahman niin, Liam thih hnua a hla tihchhuah hmasak ber tur a ni. Mahse, Sam Pounds chuan a release hun tura a tih chu a sawn a. Hei hi Liam Payne chhungte a zah vang niin a sawi.
‘Play My Guitar’ tih leh ‘Take My Time’ tih hlate avanga khawvel hriat hlawh Sam Pounds chuan, “Vawiin hian ‘Do No Wrong’ tih hla tihchhuah hun hi chelh khawtlai turin thutlukna ka siam a. Liam-a chhungte zalenna ka ngaih pawimawh rualin, he hla atanga hlawkna awm zawng zawngte hi mi dangte tanpuina’n kal thei se ka duh, mahse, an duhthlakna a ni,” tiin a X account ah a share.
Sawi chhunzawm zelin Sam chuan, “A hla hi ngaithla chakin, phurpuiin duh viau mah ila. Tun hunah chuan hetiang hla hi tihchhuah a la hun lo deuha ka ngai a. A chhan chu, Liam hi kan la sun reng a, a bik takin, a chhungte hian thlamuanna leh tawngtaina nen sun zel se ka duh a ni. Chuvangin, kan zavai-in hla tihchhuah hun kan nghah a ngai a ni,” a ti bawk.
Chutih laiin, Sam chuan a Instagram account-ah track chu a pho chhuak a. Liam-a’n a thih hma lawka audio recording a post a ni.
A clip-ah chuan, “You’re my once in a lifetime love, yeah / and I’m never gonna let you go,” tiin a zai a. Audio a share chu, “Nghak rih zel phawt ang. Liam kan hmangaih che. Chhungkua hi kan ngai pawimawh hmasa ber. Nghak rih lawk ang,” tiin caption a hmang nghe nghe.
Liam Payne-a chhungte zahna avangin ngaichang a thih hnua a track hmasa ber tihchhuah hun tur sawn
