Liam Payne thih hnuah a hla leh 1D hla stream leh hralh a kal

October ni 16-a Buenos Aires, Argentina-a a thlenna hotel bathlar atanga tlahlum pop star, One Direction member thin Liam Payne hla leh One Direction hla te chu hralh a kal thar leh a, 1D hlate hi 675%-in stream a pung a, Payne-a solo hla phei chu 858%-in a pung ve thung.
October ni 16 khan One Direction album panga a hlate official on-demand U.S. stream chu maktaduai 5.9 a ni nghal a, a hma ni chiah, Payne thih hma khan maktaduai 2.1 a ni. October ni 17-ah chuan maktaduai 22.2 a kai leh tawh bawk.
One Direction hi Liam Payne, Niall Horan, Zayn Malik, Harry Styles leh Louis Tomlinson ten X Factor-a 2010-a an din a ni a, band anga hlawhtling taka an kal hnuah 2015-ah Zayn Malik-a’n a chhuahsan a, 2016 khan band pawh chawlh an puang ve ta bawk. An album pali chu Billboard 200 (albums) chart-ah No.1 a kai a, pakhat chu No.2 a kai bawk.
Khawvel huapin October ni 16 khan One Direction hla hrang hrang stream chu maktaduai 21.3 a ni a, October ni 15-ah maktaduai 12.1 a ni. October ni 17-a chuan maktaduai 84.9 a kai nghal zawk bawk.
Payne-a solo catalog pawh October ni 16-ah US stream 9,32,000 niin, October ni 15-ah 90,000 a ni a, October ni 17-ah chuan maktaduai 3.8 a kai. Khawvel huap pawhin October ni 16-ah stream maktaduai 1.3 a ni a, October ni 17-ah chuan maktaduai 4.8 a tling nghal.
Payne thih atanga ni li chhung (Oct. 16-19)-in One Direction catalog hi US stream maktaduai 62.9 a tling a, chu chu a hma ni li (Oct. 12-15) -a maktaduai 8.2 nena khaikhin chuan a punna hi 675% a ni. Khawvel huap pawhin Oct. 16-19-a 1D catalog stream hi maktaduai 254 niin, Oct. 12-15-ah chuan maktaduai 46.9 a ni ve thung.
Payne thih hnua One Direction hla stream nasat ber chu ‘Night Changes’ niin, he hla hi 2014-a an tihchhuah kha a ni a, Billboard Hot 100-ah No.31 a kai. He hla hi Oct. 16-19-ah khawvel huapin stream maktaduai 24.5 a tling a, Oct 12-15-ah maktaduai 7.7 a ni ve thung. A dawttu chu ‘Story of My Life’ niin, he hla hi 2013-a an tihchhuah kha a ni a, Billboard Hot 100 chart-ah No.6 a kai. Oct. 16-19 khan khawvel huapin stream maktaduai 22 a kai a, Oct. 12-15-ah maktaduai 4.2 a ni.