August 23, Ningani tlai khan AFC Champions League 2023-24 group stage-a intum tur pawh fel a ni a. Lallianzuala Chhangte khelhna Mumbai City FC leh khawvela footballer tha ber pawl zinga tel mek Neymar khelhna Al-Hihal te chu group D-ah an awm tlang a, LZ Chhangte leh Neymar an inhmachhawn dawn. India rama Neymar a rawn inkhel tur hian ngaihven a hlawh a, Mumbai khawpuiah LZ Chhangte te nen an inkhel en tum an awm nghal fur.
Asia khawmuala football club te inelna ngaihhlut hlawh ber AFC Champions League 2023-24 season hi September 19, thawhleh zanah khelh tan a ni dawn a, team 20 in champion an inchuh dawn. AFC champions League-ah hian a vawi khat nan Video Assistant Referee (VAR) hman a ni ang.
ISL League champion Mumbai City FC hmachhawn tur Al-Hilal hi AFC Champions League-a club hlawhtling ber an ni a.
AFC CL-ah hian vawi li an champion tawhin, kum 1991, 2000, 2019, 2021 khan an champion a. Vawi nga ngawt pahnihna an ni tawh bawk a. AFC CL-a champion ngun ber an nih bakah pahnihna ni ngun ber an ni bawk. Season liam ta pawh khan final an lut a, final-ah Urawa Reds hneh lovin an vanduai. Asia khawmuala club hlawhtling ber an nih bakah hian Saudi club hlawhtling ber an ni bawk a, Saudi Pro-League-ah vawi 18 an champion tawh bakah King Cup-ah vawi 10 an champion tawh a, kum 2022 khan FIFA Club World Cup-ah pahnihna an ni tawh bawk.
Sum ngah Al-Hilal hian nipui bazar inhawng mekah player hrawl tak tak an la lut a. Khawvela player tha ber zinga mi leh footballer lar ber pawl Neymar meuh an lak luh vangin ngaihven an hlawh leh zual a. Neymar an neih miau vangin Mumbai City FC an hmachhawn tur pawh hian ngaihven a hlawh a. Mumbai City FC leh Al-Hilal an inhmachhawn dawn tih hriat a nih rualin India rama football ngainatute an tho nghal suau. Al-Hilal hian Neymar bakah EPL-a player hriat hlawh tak tak Ruben Neves, Aleksandar Mitrovic leh Kalidou Koulibaly te an la lut bawk a. Tawh an khirh hle ngei tura ngaih an ni.
Mumbai City FC leh Al-Hilal te India-a an inhmachhawn hun tur hi November 6, 2023, Thawhtan zanah a ni ang. India player tha ber Lallianzuala Chhangte chuan Neymar a hmachhawn thei tur chu phurawm a tih thu a sawi a. Player tha, an ngaihsan tak tak an hmachhawn tur hian hlawkna a pek ngei a rin thu a sawi tel bawk.
Group D-a Mumbai City leh Al-Hilal ten an awmpui dang FC Nassaji Mazandaran hi Iran club niin, season liam ta khan Pro-League-ah 12-na daih an ni a. Tualchhung League-ah che chhe viau mah se an club chanchina a vawi khat nan Hazfi Cup-ah an champion nawlh vangin AFC Champions League khel turin an tling. An player zawng zawng hi Iranian vek an ni teh tlat. PFC Navbahor Namangan hi Uzbek league-a pahnihna a ni ve thung a, Uzbek Cup-a team hlawhtling ber an ni tel bawk.
AFC Champions League Group
Group A –
Pakhtakor, Al Fayha, Ahal FC, Al Ain FC
Group B
Al Sadd, FC Nasaf, Al Faisaly, Sharjah FC
Group C
Al Ittihad, Sepahan SC, Air Force Club, AGMK FC
Group D
Al Hilal, FC Nassaji Mazandaran, Mumbai City, Navbahor
Group E
Persepolis, Al Duhail SC, FC Istiklol, Al Nassr