Argentina footballer Loinel Messi, kum 39, hian footballer dang zawng zawng aiin World Cup-ah a pet goal hnem tawh zawk, khawvel footballer ropui an sawi apianga hming dai tawh lo tur a ni chung hian a nupui Antonela Roccuzzo leh an fapa pathumte chu a nun a captain an ni ve thung.
Khelmuala a themthiam zia te chu tuman an hai lo, football lama chawimawina leh trophy dawn theih ang chu a dawng kim a ni deuh ber tawh a, khawvela infiammi hlawh tam berte zingah a tel a, World Cup-ah goal 21 khung tawhin, Spain nena 2026 FIFA World Cup an khelh hunah a pet goal belh leh mah na!
Chutiang taka player ropui chu ni mah se an inah chuan a nupui Antonela Roccuzzo leh a fapa pathum- Thiago, 13, Matteo, 10 leh Ciro, 8, te tan chuan chhung khat pa a nihna bak an in chhungah a luhpui ngai lo. Apple Music Zane Lowe interview-ah Messi chuan, “Kan in chhung ka luh tawh chuan midang ang bawka pa pangngai, mite pasal ang tho nih ve mai ka tum thin a, chhungkuaa mawhphurhna kan neih theuh ang kha ka ngaihtuah mai thin. Chumi piahlama ka nuna thil thleng, hmingthanna te, pawnlama mi hriat kan hlawh ve na zawng zawng te chu, kan in chhungah ka luhpui ngai lo, in chhungah chuan pa naran ve mai ka ni. Fate ka thunun a tul chang a awm a, an infiam hun ka siam sak a, chhungkua a kan infiam hun te nen, chhungkaw pangngai dang ang thoin kan khawsa a ni,” a ti.
A nupui, Antonela nen hian naupan lai atanga intawng, inhmelduh zui ta an ni. An love story hi a ngaihnawm riau.
Messi chu mipa naupang kum 10 mi lek a nih laiin growth hormone deficiency a nei tih hriatchhuah a ni a, pediatric endocrinologist chuan hormone injection regular taka nei turin a lo rawn a. Mahse, kum hnih a vei leh meuh chuan a pa insurance-in a khuh pha tawh lo, an sum neihin a tlin ta lo. Engtia tih zel tur nge tih ngaihtuahin a pa pawhin a lu thak a hiat ta nauh nauh mai le.
Chutihlai tak chuan Argentine sports agent pakhatin mipa naupang kum 12 mi ball pet lama talent nei tha tak mai chu a lo hre fuh ta a, 2000 khan FC Barcelona-a han ‘try’ ve turin kawng a zawng sak ta hlauh. Tichuan European club lian chuan a inenkawlna tur sum an tum sak thei dawn ta, 2001-ah Messi chu a nu leh pa leh a unau te nen Spain-ah an pem ta diah diah a, mahse, a nu Celia chuan a unau dangte chu Argentina-ah a let pui leh a, a pa Jorge, nen an inzui ta a, a pa chu a agent leh a thiantha, a thu kal leh haw lam engkim hriatpuitu a ni ta a ni.
Messi chuan Barcelona youth academy La Masia-ah hmun a chang ta a, a debut season-ah a chetha nghal hle a, under-16 level-ah game 31-ah goal 38 a khung nghal pang. Chuta tang chuan Messi football zinkawng chu a kaw ta ruih mai a ni.
Messi chu a lungleng thin, an khua Rosario a ngai thin. Tichuan, 2005-ah thiante thihna avangin a haw a, chutah chuan kum 17 mi ve ve Antonela Roccuzzo nen an lo inhmel duh tan ta. 2009-a Catalan TV3-in an kawmnaah Messi chuan, “Ngaihzawng ka nei alawm. Ani chu Argentina-ah a awm,” tiin confi takin a sawi thei tawh a, kar hla di mah ni se “Kan tha e, kan hahdam e,” a ti thei bawk.
Roccuzzo chu National University of Rosario atanga a graduate hnuah Barcelona-ah a pem ve ta a, chuta tang chuan vawiin thlengin an la inthlah leh ta lo. Roccuzzo chu Messi hlawhtlinna phena hmeichhe pawimawh tak a ni zui ta a. 2019-a Marca-in an kawmnaah Messi chuan Roccuzzo chungchang sawiin, “|hatna kawng hrang hrang a ngah a. A nitin khawsak te, a personality te, engtik lai pawha a hlim reng thei te, harsatna hmachhawn dan a thiam zel mai te hi a ngaihsanawm a ni. Nu hawi zau leh hringnun zingkawng zawhpui tura duhthusam a ni,” a ti.
June 2012 khan World Cup qualifier-ah Ecuador laka a goal khung lawm nan Messi chuan a kawr hnuaiah ball dahin a dul a tipuar a, khawvel hriatah an fa neih tur a puang ta. Tichuan, Thiago pian atanga thla hnihnaah El Periodico de Catalunya-in an kawmnaah Messi chuan fa neih chuan “thil zawng zawng a tidanglam,” tiin, “Tunhma chuan ka duh anga thil a thlen loh chuan ka lungawi lo a, tu thu mah ngaithla duh lovin ka inla hrang thin. Mahse, tunah chuan in ka’n thleng a, ka fapa ka hmu a, engkim a dik leh vek mai thin,” a ti.
Barcelona-a a khelh lai chuan an chhungkuain Castelldefels-a private compound zau takah an khawsa a, gym, theater leh football field thlengin an nei. A hman remchan ni chuan a fate school kal tur a hruai a, a training zawhah inah a nupui kiangah a awm hahdam a, a fate school bang a hruai a, chhungkuain zanriah an kilho a, zan mengrei lovin an mu leh dial thin.
June ni 30, 2017-ah Rosario-ah ngei Messi leh Roccuzzo te chuan “Tiam tlat e,” an ti ta. An inneihna pawh a ropui e, Shakira leh chutihlaia a kawppui Gerard Pique te, Luis Suarez leh Neymar te pawh mo lawmnaah an tel. An khaw chanchinbu te chuan ‘wedding of the century’ an ti hial a ni.
Barcelona-a season 17 a khelh hnuah Paris Saint-Germain-ah 2021 khan a kal ta a, an chhungkuain Neuilly-Sur-Seine-ah an pem a. Chutah, 2022 a rawn inherchhuak a, Messi tana kum pawimawh a ni, World Cup-a Argentina a champion pui kum kha. Kum 36 chhunga World Cup-a Argentina an campion lehna hmasa ber a ni.
The Athletic-in an kawmnaah Messi chuan a nupui Antonela leh a fapa Thiago te chuan national team game zawng zawng an hmaih lo a, an hmachhawn tur te, an game khelh hun tur te nen lam an ngaihtuahpui a, “Zep lohah chuan ka nupui fanau ten min ngaihtuahpui lutuk khan pressure min siam nasa zawk,” tiin champion ngei duhna leh tumna a neih lentir lehzual niin a sawi.
An champion ta reng a. Antonela Roccuzzo chuan Messi-a’n World Cup trophy a fawp lai thlalak chu Instagram-ah post-in, “MY CHAMPION” tiin a caption-ah a dah.
Messi pawhin December 31, 2022 khan tihian social media-ah kum kharna thu a dah a, “Ka kum theihnghilh tawh ngai loh tur chu a tawp dawn ta. Ka suangtuahna a taka chantir tuma ka beih thin chu a takin a thleng ta. Mahse, chhungkaw duhawm tak, anni aia tha zawk thlan tur awm tawh chuang lo te hi min lawmpuitu turin nei ta lo ila, a hlutna a awm leh miah si lo ang. |hiantha min support-tu, ka tluk chang pawha min kaitho leh thintu te nen hian,” a ti.
Tichuan, 2023 a rawn inher chhuak a, Messi chu David Beckham-a club Inter Miami lamah a insuan ve leh ta. Roccuzzo leh an fate nen Florida lamah an inpu lut leh ta a, America-ah bu thar khuarin, Fort Lauderdale-ah dollar maktaduai 10.75 man, 10.500 square feet a zau in lianah an khawsa leh ta. America-ah pawh a nunpung a danglam chuang lo. OLGA host Migue Granados nen an inkawmnaah Messi chuan, “Chawhnu dar 1-ah training kan zo a, chuan, inah ka haw a, Antonela nen chawchhun kan fâk a. Chumi hnuah ka mu chawl zuai a, TV leh movie-te kan en dun thin,” a ti. Hemi tum hian fa dang neih belh lam te pawh an sawi kai a, “A tum ngawr ngawr lam ni lovin, fanu te pawh kan nei ve tawh mah na, kan la hria ang chu,” a ti bawk.
Tichuan le, hei kum 2026 World Cup final-ah Argentina leh Spain an inhmachhawn dawn ta a, Messi hi a zawnin World Cup champion a ni thei ang em? Lo thlir phawt mai ang le!
Lionel Messi & Antonela Roccuzzo private love story
