Lirnghing thlen thulha chet lak dan tur nunchan zir

The Aizawl Post

9 hours ago

Nimin khan Mizoram district hrang hrangah, lirnghing a thlen thulha chet lak dan tur nunchan zirna (mock exercise) neih a ni.
Nunchan zirnaah hian Champhai hmar lamah 7.1 magnitude-a naa lir nghing anga ngaih a ni.
Nimina nunchan zirnaaah hian zing dar 10:00-ah siren tihrik a ni.
Aizawlah chuan, DC Conference Hall chu District Emergency Operation Centre (DEOC) atan hman niin, Er. Lalhriatpuia, Aizawl DC, Chairman, ADDMA ni bawk kaihhruaina hnuaiah ADDMA member-te’n vilin, he’ng hmuna thil thleng chanchin an la khawm a, nunchan zirna hmuna thawktu leh bungraw tul angte thawnchhuahna thupek an chhuah a. Building-te chimin, Lok Bhavan-ah kangmei a chhuak a. Electric leh communication line-te, tui pipe-te chhiain, kawngpui a khi bawk a. thing leh electric ban tlute’n kawng a dang bawk.
Zing lam report-ah chuan mi 5-in nunna chanin, mi 44-in hliam an tuar a, hliam tuar mi 10 hospital thlenpui niin, 6 admit an ni. Relief camp-ah mi 20 dah an ni bawk. Chhun dar 1-ah DEOC-ah incident site hrang hranga duty-te fuan khawmin, Site Incident Commander leh Observer-te report hmangin thlirletna hun (debriefing) neih a ni a. Heta tang hian inzirna tur laite sawi ho a ni.
Mock Drill hi sawrkar laipui ruahman anga neih a ni a. Aizawl District-ah chuan Aizawl District Disaster Management Authority (ADDMA), Mizoram State Disaster Management Authority (MSDMA) leh National Disaster Management Authority (NDMA)-te ruahmannain zing lamah hmun hnih – OLAS School, Tuikhuahtlang leh Lok Bhavan-ah te neih a ni a. Aizawl Hospital & Research Centre, Khatla chu Hospital atana hman niin, staging area atan Lammual Ground, relief camp atan Lok Bhavan hman a ni bawk.
Mock exercise hi zan lamah Lok Bhavan-ah neih leh tura ruahman a ni.
Nimina nunchan zirnaah hian Aizawl Hospital, Civil Hospital Aizawl, Police, MPRO, PWD, P&E, PHED, FCS&CA, NDRF, QRT, 1st MAP (SDRF), 3rd MAP (SDRF), CDRT, Fire & Emergency Services, , Transport Dept, I&PR, Traffic, NIC, Aapda Mitra, NCC, leh Civil Aviation-te an tel a ni.