Lirnghing tuar Afghanistan tan India che chhuak rang

Lirnghing tuar Afghanistan tan India che chhuak rang
India chuan Thawhtanni tuka magnitude 6.3-a na lirnghingin Afghanistan hmar lam a sawi hnuah tanpuina rang takin a thawn nghal a, External Affairs Minister S Jaishankar-a’n Taliban Foreign Minister Amir Khan Muttaqi-a a be nghal bawk.
Lirnghing hian Samangan, Balkh leh Baghlan province-te a sawi a, mi 20 thiin za telin hliam an tuar bawk a. Hei hi September thla atanga Afghanistan-in lirnghing na a tawrh vawi hnihna niin a hma pawhin India hian puihna tam tak a thawn tawh.
Afghanistan-a public health ministry chuan mi 20 chuang thi leh hliam tuar mi 534 an awm thu a sawi a. Balkh–Samangan highway pingin Samangan province-ah chenna in leh dawr tam tak a chhia niin a sawi bawk.
A hmaa lirnghing an lo tawrh tawh tum ang bawkin Jaishankar-a chuan Muttaqi-a chu lir a nghin hnu rei lo teah a be nghal a. Nunna tam tak chân a ni pawh pawi a tih thu chu social media-ah tar langin chhawmdawlna thilte thawn tura buatsaih nghal a nih thu a tar lang tel.
“Damdawi tul dangte pawh a thleng thuai ang,” a ti.
External affairs ministry thupuangtu pawhin India-in chhawmdawlna a thawnte Kabul-a dawn a ni lai thlalak a tar lang bawk.
Afghan foreign ministry chuan social media-ah vek India-in ei tur tonne 15 a thawn thu leh damdawi mamawh zual leh ei tur pawh a thawn belh a, a thleng thuai dawn tih a tar lang.
Taliban sorkara mi pawimawh zinga India tlawh hmasa ber, Muttaqi-a chu thla hmasaah India-ah a zin a, Jaishankar-a nen inkawmin ram pahnih inkar thil tam tak an sawi dun.
“A lo tlawh hian kan inkara inkungkaihna that zelna tur tam tak kan sawi duh a, India leh Afghanistan-a mite an inpawh hret hret zel hi a lawmawm hle a ni,” tiin khatih lai khan Jaishankar-a chuan social media-ah a tar lang nghe nghe.