Lirnghingin a zawnin Venezuela sawi, mi 32 thi finfiah tawh

Venezuela-ah indawt zata magnitude 7.2 leh 7.5-a naa lir a nghin hnuah emergency puan a ni a, mi 32 thi hriat a ni.
Nilaini zana lirnghing hian chhiatna nasa tak a thlen a, a bikin an khawpui, Caracas-ah chhiatna a tam hle a, mi zawn leh chhanchhuah hna kalpui mek a ni.
Emergency crew-te chuan building chimte an dap a, thuneitute chuan Caracas-a an ram thlawhna tumhmun lian ber an khar a, sikul an chawl a, damdawi ina thawkte chu chhiatna thlennaa che thuai turin an ti.
United States Geological Survey (USGS) chuan ‘mihring thihna tam tak leh chhiatna nasa tak a awm a rinawm’ tiin a sawi a, kum zabi khat chuang chhunga lirnghing na ber pakhat hian ‘thihna rapthlak tak’ a thlen thei tih US President Donald trump-a’n a sawi bawk.
Venezuela-ah hian kum 1821-a Carabobo indona hriatrengna atana ram pum chawlh ni tak, Nilaini tlai dar 06:04 (India-a Ningani zing dar 03:34) vel khan lir hi a nghing.
Chhiatna nasa tak thlengtin chhanchhuah hna thawktute chak zawka an chet theih nan sorkarin emergency a puang a. tV-a thu a sawiah president lailawk, Delcy Rodriguez-i chuan doctor, nurse leh damdawi thiam dangte chu damdawi in leh clinic-ah in-report nghal turin a ngen a, hliam tuarte enkawl tura pui turin a ngen.
Chhiatna thlen nasatna ber hi Caracas a ni a, a bikin Altamira district-ah a zual a. Mi tam takin an chhungte chin hriat loh an zawng a, emergency crew-te pawhin in chhawng 22-a sang chim atanga dam chhuakte an chhanchhuak bawk a. Chhiatna thlen dan kimchang hi hriat vek theih a la ni lo.
Rodriguez-i chuan mi 32 an thi tawh a, mi 700 velin hliam an tuar tih a sawi a, nghing nawn (aftershock) vawi tam tak a awm leh tawh bawk tih a sawi.
thuneitute chuan thite nihna an la tichhuak lo va, mi zawn leh chhanchhuah hna thawh zel la nih avangin a zat hi a la pun an ring.
Caracas-a Altamira leh El Paraiso vengte chu a tuar nasa ber a ni a. La Guaira leh Venezuela lailiah pawh chhiatna a thleng bawk.
USGS pawhin thi zat hi a pung viau thei tih a sawi a, in tam tak chu leirawhchan leh hluma sak a tam vang niin an sawi.
thi hi mi 1,000 leh 10,000 inkar a nih theihna chance chu 39% a ni a, mi 10,000 atanga 1,00,000 vel thih theihna chu 37% a ni bawk tih an sawi.
USGS-in a tar lan danin lirnghing pahnih hi Caracas chhim lam, Yaracuy state-a intan a ni a. A hmasa zawk, magnitude 7.2-a na hi km 22-a thuk atanga niin minute khat pawh a liam hmain magnitude 7.5-a nain km 10-a thuk atangin a sawi leh a ni.
A intanna hi khawpui dai ni mah se Caracas pum leh Venezuela laili leh khawthlang hmun tam tak, Carabobo, Miranda, La Guaira leh trujillo state-te pawh a sawi nasa a. An thenawma Colombia leh Brazil-a Amazon bial hla tak, Caracas atanga km 1,700 aia hlaah pawh hriat a ni.