Lirthei ke pali nei, a bikin passenger phur chiten anmahni chhuizui theihna tur khawl an vuah ngei ngei a ngai tawh dawn a. Mizoramah hei hi hman tan tur niin, hemi vil a, enkawl zui turte awmna, Control and Command Centre pawh Zirtawpni khan hawn a ni. A hawngtu Transport minister TJ Lalnuntluanga chuan, nunau chak lo zawkte humhim nan hetiang emergency button leh lirthei thlen chin chhuina hmanrua hawn a ni chu ram hmasawnna bul a nih a beisei tih a sawi a. Passenger phur lirthei khalhtute an fimkhur phah anga, kan him phah dawn a ni, tiin, police-te pawh hnuchhui nan a pui thei dawn tih a sawi a ni.
National Informatics Centre Aizawl hotute sawi danin, Vehicle Location Tracking & Emergency Alert System (VLT & EAS) hi kum 2012-a Delhi-a bus chhunga pawngsualna rapthlak tak thleng ‘Nirbhaya case’ avang khan India sawrkar chuan passenger-te, a bikin hmeichhiate himna tur ngaihtuahin, Ministry of Road Transport & Highways chuan kum 2016 khan Central Motor Vehicle Rules-ah thuchhuah a siam a. Vehicle location tracking device leh emergency alert button chu passenger phur lirthei ke pali leh a chunglam nei, 2019 January 1 hnulama register-ah vuah vek tura tih a ni.
VLT& EAS hian two wheeler leh three wheeler (auto-rickshaw) a huam loa, Mizoram tiamin state parukah India ramah hman a ni tawh. He project hnuaiah hian National Informatics Centre Service Inc., Ministry of Electronics & Information Technology kaltlangin thawktu 15 dah a ni a, Command and Control Centre-ah hian ni khatah darkar 24 chhung thawktu awm tura ruahman a ni.
Transport minister hian Zirtawpni vek hian Khawthlangtuipui leh Tuichawng lui inkar km. 23-a Inland Water Transport (IWT) Project kalpui tur lungphum a phum bawk a. Luidung 16, Forest department-in a humhalh meka kan ram lui zawng zawng IWT atan hman tangkai theih ni lo mah se, a theih tur luiah insawrbingin, hlawhtlinpui tumin hma lak nise, an tih thu a sawi. Chhimtuipuiah techno feasibility survey kalpui mek a ni, tiin, “Ramri buai thin avangin IWT Project hi ngaihpawimawh lehzual a ni a, a hlawhtlin chhan pakhat pawh a ni,” a ti. Ei leh bara kan intodelh nan leh thenawm ramte nen insumdawn tawnna atan tangkai tak a nih a beisei thu a sawi bawk.
LT&EAS project thiltum:
# Hmeichhia leh naupangte passenger phur lirtheia an him zawk nan
# Passenger vehicle-a harsatna tawkten awlsam taka tanpuina an koh theih nan
# Passenger vehicle awmna hmun awlsam taka hriat leh chhui zung zung theihnan
# Rang taka Emergency Response Support System Team, Police department hnena hriattir a nih theih nan
# Vehicle location tracking device leh emergency button chhui bakah enthlak theihna tur monitoring centre siam a tel.
# Lirtheia harsatna tawk – pawngsual, insuam/ inrawk, accident eng pawh thleng se, ‘panic button’ an hmeh veleh Command & Control Centre leh ERSS (Police department) ah alert thlengin, harsatna thlenna hmun chhui chhuakin, hma lak zung zung theih a ni ang.
# VLT device hian Command & Control Centre-ah lirthei a nun chuan lirthei dinhmun a thawn reng a. Lirthei awmna, tlan chak zawng, signal dawng tha lo, device tihchhiat tum, SIM card nung tha lo te a hriat theih a ni.
IWT Project:
# Khawtlangtuipui – Tuichawng lui IWT atan Ministry of Ports, Shipping & Waterways chuan crore 22.93 (DPR) siam a pawm tawh.# Phase-I atan Rs. 6,17,86,000 sanction niin, Rs. 1,23,57,000 release a ni tawh.
# Phase-I-ah hian km.6, Kawrpuichhuah /Thegaduar (Bangladesh border) atanga Tlabung inkar a ni a. M/s Coastal Consolidate Structure Pvt. Ltd. Vijayawada, Andra Pradesh-in a thawk ang.
# Phase-I hnathawh turah hian forest clearance hmuh a ni tawh.