An sawrkar hlima lirthei lei thar dawn lo nia insawi chief minister Lalduhoma chuan tunhnai khan amah zuitu tur lirthei pathum a lei thar leh tawh niin Congress Thalai chuan an sawi.
Congress Thalai president Laltawnliana chuan 2023 December 8-a ZPM sawrkar lakluh ni khan chief minister hian ni 100 chhunga an tih tur a puang a. Kum 2024 hi sawrkarin sum inrenchem kum atan puan a ni tiin, chumi atan chuan chief minister, minister leh MLA ten 4th grade an neih theih chin tih tlem a nih tur thu; chief minister, minister adt. tan lirthei kawl theih chin tih tlem a nih dawn thu bakah chief minister, minister leh MLA te tan lirthei lei a nih loh tur thu a sawi tih a sawi a ni.
Hetiang a nih lai hian chief minister hian motor 5 a kawl bakah CM Office-a hman turin officer thenkhat motor kawl lai a chhuhsak tih a sawi a. A chhuhsak zing ami MZ 01 M 7012 TUV pawh tun thlengin pek let a nih an la hre lo tih a sawi.
Tunah chief minister zuitu (escort vehicle) atan, tih chhuanlamin chief minister hman tur Mahindra Thar pathum lei leh a ni tih Congress Thalai hruaitu hian a sawi. “Heng motor hian kumin August khan Mualpui Aizawl a thleng tawh a. Tunah hian Police Hqrs Aizawlah document tih fel ngai a la awm avangin an kawl mek. Heng motor pathum – MZ01 AC 1900, MZ01 AC 1901 leh MZ01 AC 1902 te hi Pu Lalduhoma’n an rintlak loh, keimah min beitu tia a sawi Director General of Police Mizoram hminga register a ni,” a ti.
CM escort vehicle atana lei Mahindra Thar model pakhat hi nuai 17 man niin, pathum leina atan hian mipui sum cheng nuai 51 senral a ni leh tih Laltawnliana hian a sawi a. Hemi hma hian Assembly speaker lirthei Mahindra XUV lei nan nuai 28 leh Assembly speaker quarters chei nan nuai 23 hman niin, speaker lirthei leina leh quarter cheinan mipui sum nuai 51 senral a ni tih a sawi.
“ZPM chief minister chuan car pakhat bak a mamawh ve dawn lo. ZPM minister chuan car pakhat bak a mamawh ve dawn lo. Mi’in an tih theih chu enge kan tih theih loh ang? Chief minister, minister leh MLA te a hmahruaitu an ni ang, a tih kha mipui bumna, lal chak leh lal duh luat avanga mipui vote an dilna mangkhawng mai a ni,” a ti.
Lirthei thar lei tum lo nia insawi CM-in escort vehicle 3 a la thar – Congress Thalai
