Lirthei tlan tluang, bungrua lut tha

Kawng chhiain a tihbuai Mizoramah kawng siam a nih hnuah bungraw phurtu lirthei an tlan tluang a, bungrua pawh a thleng tha rih.
Assam atanga bungraw lakluhna kawng pawimawh, Vairengte leh Aizawl inkar kawng a chhiat avangin kar hmasa lam thleng khan Mizoramah ni tin mamawh thil a vang hman a, tun karah erawh lirthei an tla tluang tawh.
Kawng siam a nih avangin lirthei dintir an ni a, September ni 21 tlai dar 5.30 atangin lirthei dintirte hi tlantir an ni. Chumi hnuah chuan lirthei engemaw zatin Aizawl an tlan thleng tawh.
Vairengte police te’n an chhinchhiah danin, ni 21-a lirthei tlantir an nih hnuah, ni 26 zing lam dar 8 thleng khan Silchar lam atangin Mizoramah lirthei 974 a lut tawh.
Police te’n an chhinchhiah danin, tuialhthei phur (tanker) 46 an lut tawh a, eirawngbawlna gas phurtu truck 79 an lut tawh bawk.
Lirtheiah hian HMV a tam a, 311-in Vairengte an paltlang tawh. HMV hi bungrua leh ni tin mamawh thil phurtu an ni. Bungrua leh lirthei phur lirthei dan MMV pawh an lut tha a, 216 a tling.
Khualzin phurtu sumo pawh 74 an lut tawh a, bus pahnih an lut tawh bawk. LMV 246 a lut tawh bawk.
Tun hnaia kawng siam that, Kawnpui leh Aizawl inkar kawngah harsatna a awm rih lo a, thu dawn danin, tun hnai ruah surah pawh lirthei tlan vel buaina tur a awm rih lo.
Ni tin mamawh thil hrang hranga harsatna pawh a zia hret hret a, tuialhthei pawh a harsa tawh lo. Thil thenkhatah erawh, mamawhna a lo san hman avangin thleng thar awm mah se a la tam tak tak thei lo tih thu dawn a ni.