Sawrkarin oil man tihsan a sut leh tak avang leh cabinet-in siamthat a tum avangin lirtheia eizawngte chuan tiamchin awm loa tlan loh an tum chu an thulh rih.Lirtheia eizawngtu pawl ho intelkhawmna, Mizoram Commercial Vehicle Union (MCVU) hruaitute leh chief minister Lalduhoma chu Zirtawpni khan an inkawm a. MCVU chuan an ngenna anga chief minister-in kumin September atanga Mizorama oil man tihsan chu a sut leh a siam avangin lawmawm an tih thu an sawi.
MCVU-in oil man sang tihniam tur leh kawng chhia siam hmanhmawh tura an ngenna chu kumin October 16-a cabinet thutkhawmah rel a ni dawn tih chief minister-in a hrilh avangin, cabinet thuchhuak nghah nise an ti.
Kawng chhe chungchangah Mizoram PWD chan zawngah chak taka hma lak nise, an ti a. A chhe zualpuiah sawrkar hmalak mek bakah hmun hrang hranga company hrang hrangin an chan chinah chak taka hma la turin chief minister hriattir se, an ti.
MCVU chuan district hrang hranga an member-te leh a thlawptute lawmthu an sawi tih sawiin, October 16-a cabinet thukhawmin an lungawina zana an thil phut an tihlawhtling lo a nih chuan an kal zel dan tur an inhriattir leh dawn tih an sawi a ni.
Lirtheia eizawngten nawrh tum thulh
