Site icon The Aizawl Post

Liverpool hneh loh PSV

UCL 2024-25 khelh mek League round-ah vawi sarih zet chak zawn a, vawi sarih chak zawn thei awmchhun Liverpool chu an match hnuhnung berah Dutch club lian PSV Eindhoven hneh lovin an tlawm. PSV lakah tlawm mah se Liverpool hi table chung berah an awm tluan ta tho thung. Reds an chak loh lai hian EPL club pahnih; Arsenal leh Aston Villa ten hnehna an chang a, last 16 an lut chiang nghal.
Last 16 lut chiang tawh leh EPL-ah champion ngei tuma tan khawh an nih vangin Liverpool manager Arne Slot chuan PSV Eindhoven lakah a player thate a awltir a. Khel tlem zawkte khelhna hun pein, a second team a chhawr. Liverpool B team te hi Dutch club lian lakah khel tha thawkhat viau mah se uiawm takin an tlawm tlat thung.
Last 16 lut chiang hmasa ber Liverpool hian Philips Stadion-ah bul an tan chhe lova, Cody Gakpo chuan minute 28-naah penalty pet goal in, hmahruaina goal a thun. An mualah goal chhuah hmasa mah se PSV in an si phurh an sut thuai a, Johan Bakayoko chuan minute 35-naah goal thunin an si phurh a sut.
1-1 a nih hnuin Liverpool an che fuh nawn leh a, Harvey Elliott chuan minute 40-naah hma an hruai nawnna goal a thun zui leh. An mualah hnufual nawn leh mah se PSV an duai bik lova, chawlhlawk hmain hma an hruai let hman ta hial. PSV tan hian Ismael Saibari chuan minute 45-naah goal thunin an si phurh a sut a. Chawlhlawk dawn tep minute 45+5-ah Ricardo Pepi chuan hma an hruai letna goal a thun. Chawlhlawk hmaa an hmahruaina hi hum tawp thlengin an venghim a, Liverpool lakah hnehna hlu tak an chang.
PSV lakah tlawm mah se Liverpool hi league champion an ni zui tho a. Liverpool laka point thum hlu tak an hmuh hmangin PSV pawh play-off khel turin an tling ve bawk.
EPL hmahruaitu Liverpool an tlawm lai hian Arsenal chuan mikhual an nihna hmunah 2-1 in Girona an hneh a, pathumna ni chungin last 16 an lut. Gunners hian an lenluhna malah goal chhuah hmasa bawk mah se Jorginho leh Ethan Nwaneri te goal thun hmangin hnehna an chang let a, last 16 an lut chiang nghal. Arsenal rual hian English club Aston Villa chuan an mikhual Celtic chu 4-2 in an hneh a, an tlang chiang nghal bawk.

Exit mobile version