English Premier League champion Liverpool chuan an squad thuamchak leh zual tumin tan an khawh zui zel a, an tlarhma thuamchak tura an duh Eintracht Frankfurt striker Hugo Ekitike chu an dawr fel thei tep tawh.
Liverpool hian Uruguay forward Darwin Nunez hralh an tum a, Nunez hmunruak luahtu atan Hugo Ekitike hi an duh. Kum 23 mi, hmabakj eng tak nei Ekitike hi £70m senga lak tumin an dawr phawt a, rang takin Eintracht Frankfurt lamain an lo hnar ve thung. Reds hian an lei ngamna an tisang a, £70m bakah pek belh leh theih turin an dawr nawn leh a, inremna an nei thei dawn hnai niin tarlan a ni.
Newcastle United pawhin lak tuma an ngaihven Ekitike hian season liam ta khan Eintracht Frankfurt tan Bundesliga-ah vawi 31 a khel a, goal 15 a thun a, Eintracht Frankfurt hi Bundesliga-ah pathumna an ni. Goal 15 a thun bakah hian assist vawi 8 a nei bawk a, goal contribution vawi 23 a nei. Europe a league lian zual pangaa kum 23 hnuai lam zingah goal contribution neih that lamah palina a ni phak. A kum a la naupang a, goal hmaah a hriam viau bawk si nen club lian hrang hrangin lak tumin an ngaihven hlawm.
EPL champion Liverpool hian an tlarhma luah lum tura an duh ber chu Sweden striker Alexander Isak a ni. Liverpool leh Arsenal ten EPL a hriam sa Isak hi lak duh viau mah se Newcastle United in zawrh lai a ni lo an ti a, hralh an tum loh bur si vangin club lian pahnihte hi khaw dang hawi lo thei lovin an siam. Isak an lak theih dawn loh vangin Liverpool hian Ekitike hi an ngaihven zui thuai. Ekitike hi chuan Champions League champion Paris St-German zawm a chak ber a. PSG hian tlarhman player an nei tha tawk a, Ekitike an mawh lem loh vangin an uksak lo. Isak hralh phal lo tu Newcastle United ngei pawhin Ekitike hi an ngaihven ve bawk a, Isak kawppui atan lak luh duh viau mah se Liverpool an el phak dawn lo niin a lang.
Reds hian forward Diago Jota an ch^n tawh a, Darwin Nunez chhuahtir an tum bakah Luis Diaz chuan Bayern Munich zawm a tum ve mek bawk. Heti a nih vang hian forward thar an mamawh viau a, Ekitike hi lak luh ngei tumin tan an khawh zui ang. Ekitike lak tuma hma la mektu Liverpool hian £116m zet sengin German midfielder Florian Wirtz an la lut tawh a. Defender pahnih Milos Kerkez leh Jeremie Frimpong te an la lut tawh bawk a, EPL champion nih nawn leh ngei tumin tan an khawh.
