Inrinni zan khan English Premier League khelh chhunzawm a ni a, hmahruaitu Liverpool chuan hnehna chang lehin hma lam an pan zel. Liverpool in hnehna an chan rualin an elpui lian Arsenal leh Manchester City ten hnehna an chang a. Pathumnaa awm mek Nottingham Forrest chu AFC Bournemouth lakah an mualpho ve thung.
Point 6 in Liverpool an fal
Table-a hmahruai mektu Liverpool chuan Anfield-ah tlahniam thei dinhmuna ding mek Ipswich Town an mikhual a, 4-1 a hnehna changin point thum an hmu. An mualah an chak leh tak vangin khelh khata khel tlem zawk chungin Reds hian an hnuai chiaha awm Arsenal lakah point rukin hma an hruai. Arne Slot enkawl Liverpool hian champion tumin hma lam an pan zel.
Liverpool hian an mikhual Ipswich Town lakah an khel tha viau a, chawlhlawk hmain goal thum ngawt an thun hman. Reds tan hian Dominik Szoboszlai chuan inkhel tan atanga minute 11-na lekah hmahruaina goal a thun. Szoboslai goal thun hnu hian Mohamed Salah leh Cody Gakpo ten chawlhlawk hmain goal an thun belh leh a, si thum faia hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal an thun belh leh thuai. Minute 44-naah an goal thumna thuntu Gody Gakpo chuan minute 65-naah an goal lina a thun a, an hmahruaina a tizau. Hmahruaitu Loiverpool lakah si li an phurh reng hnuin 18-naa awm mek Ipswich Town tan Jacob Greaves chuan minute 90-naah goal thunin an si phurh a sut then. Goal thun teh mial mah se Reds lakah tlawm an pumpelh zo ta chuang lo thung.
Manager thar Arne Slot hnuaia khel tha tluang tak Liverpool hian EPL season kal mekah vawi 22 khelin point 53 an hmu mek a, point rukin an sang fal mek. Reds hi champions league-ah last 16 an lut chiang tawh a. League round khelh match khat la awm leh Last 16 play-off khelh chhungin an hahdamna hun tha an nei thei dawn.
Tlem zawk chunga chak Arsenal
FA Cup-ah tam zawk ni chunga Manchester United laka tlawm Arsenal chu Wolves lakah tlem zawk ni chungin an chak ve ta a, EPL-ah pahnihna an ni chhunzawm zel.
Champion beisei zui tura chak mamawh Arsenal hian Emirates Stadium-a an mikhual Wolves lakah an khel tha hran lova, goal pawh an thun har hle. Chak mamawh tak chunga goal an thun theih loh reng laiin Myles Lewis-Skelly chu minute 44-naah hnawhchhuah a ni. Arsenal laka zah ngai lo thin tak Referee Michael Oliver-a’n Lewis-Skelly a hnawhchhuah dan hian inhnialna a chawk chhuak zui nasa hle. Michal Oliver hian Arsenal lakah record a nei chhe hle a, EPL match a enkawl tawhah Arsenal player a hnawtchhuak ngun ber a. Arsenal player lakah yellow card a phawrh hnem ber bakah Arsenal hi penalty a chawitir tam ber bawk. Michael Oliver thutlukna hian Arsenal a tihnual hman hle.
An mualah tlem zawk ni chunga inlan Arsenal hian goal an thun thei lo reng a, an mualah an chak zawh loh mai a hlauhthawnawm hman hle. Tam zawk an nih reng hnuin Wolves an vanduai ve thung a, minute 70-naah João Gomes hnawhchhuah a ni. Player 10 ve ve an nih hnuin Arsenal in goal an thun ta thuai a, Gunners tan hian defender Riccardo Calafiori chuan minute 74-naah goal pawimawh zet a thun. Calafiori goal thun hi hun tawp thlengin an humhim a, an mikhual Wolves lakah hnehna changin point thum hlu tak an hmu.
Forrest an mualpho
Hmahruaitu Liverpool leh pahnihnaa awm Arsenal ten hnehna an chan laiin pathumnaa awm mek Nottingham Forrest chu AFC Bournemouth lakah 5-0 ngawtin an tlawm a, mualpho.
Pasarihnaa awm mek AFC Bournemouth hian pathumnaa awm mek Nottingham Forrest an ngam hle. An mikhual lakah hian inkhel tan atanga minute 9-na lekah Justin Kluivert chuan hmahruaina goal a thun nghal. Hma takah goal thun mah se chawlhlawk hmain goal an thun belh thei lo. Chawlhlawk hmain goal khat chauh thun mah se chawlhlawk hnu lamah goal li ngawt an thun belh leh ta thung a, pasarihnaa insawhnghet leh zual turin hnehna an chang.
Bournemouth tan hian Dango Ouattara chuan goal thum thun zawnin hattrick a siam a. 4-0 ngawta hma an hruai hnuin season kal meka tha 87’Antoine Semenyo chuan minute 90’+1-ah an goal ngana thunin an chakna a nemnghet a. An mualah awlsam takin an chak zui ta a ni.
City in Chelsea an lehthal
Inrinni zana inkhel ngaihven hlawh berah Champion lai Manchester City chu an mikhual Chelsea chu 3-1 in an lehthal a, an mualah point thum an hlawhchhuak.
Champion beisei ngam tura chak zel mamawh City hian an mikhual Chelsea lakah bul an tan chhe hle. City hian an defender thar Abdukodir Khusanov tihsual vangin minute thumna lekah goal an chhuah. City laka Chelsea hmahruaina goal hi minute thumnaa Noni Madueke thun a ni. Hma takah goal an chhuah vangin buai deuh mahse City in chawlhlawk hmain an si phurh an sut hman. Chawlhlawk dawn hnaih minute 42-naah Josko Gvardiol chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm viau a, City an vannei ve ta thung. Chelsea si nghak Robert Sanchez chetsual vangin Erling Haaland chuan minute 68-naah awlsam takin a pet goal a, hma an hruai letna goal a thun. Team lian Chelsea lakah hma an hruai let hnuin City an khel tha zui hle. Haaland ball fing tak chhawr tangiin Phil Foden chuan minue 87-naah an goal thumna a thun a, hun tawp thlengin goal dang a luh belh thei tawh lo. Champion lai City chuan an malah 3-1 in hnehna an chang a, palinaah an insaawh nghet.
Liverpool in hma lam an pan zel
