Nilai zan khan UEFA Champions League last khelh zawh a ni a, an mualah 4-0 ngawta hnehna changin Liverpool in quarter-final an lut. Liverpool in quarter-final an luh lai hian an muala chak chungin Tottenham Hotspurs an tla ve thung.
Salah hnuhma thar
English club lian Liverpool hian Anfield-ah Turkish club lian Galatasaray an mikhual. An mikhualte hi Mimualah 1-0 in an lo hneh lo tawh a, si khat phur sa chungin an mualah an inlan. Mikhual team talbuaina thin Anfield-ah Galatasaray an talbuai a, si li ngawt an phur. Galatasaray an sawp tum hian Liverpool forward Mohamed Salah chuan goal a thun a, UCL-ah goal 50 thun tling chiahin mimal hnuhma thar a hnutchhiah.
Mimuala tlawm tawh Liverpool hian an mualah chak ngei tumin tan an khawh a, khelh pawh an khel tha viau. Ngam takin an mikhualte an nawr a, hlauhawm an siam nghal mawlh mawlh. Uiawm taka an hun tha neih an hlah hnuin season kal meka khel tha tluang tak Dominik Szoboszlai chuan minute 25-naah hmahruaina goal a thun a, first leg-a an si phurh a sut zo nghal bawk. Szoboszlai goal thun hmang hian Reds in 1-0 a hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal thum ngawt an thun belh. Minute 51-na lekah Hugo Ekitike chuan an goal hnihna leh si belhkhawma hma an hruai letna goal a thun. Goal an chhuah zawn vangin Galatasaray an buai viau. An mikhualte an talbuai lai chuhin Liverpool in na takin an nawr zui a, goal an thun belh zui leh nghal zat. An goal hnihna thun atanga minute hnih hnu lekah Ryan Gravenberch chuan an goal thumna a thun zui leh zat a, an hmahruaina a tizau.
3-0 a hma an hruai hnuin Liverpool an khel tha chhunzawm a, goal tam zawk thun belh tumin an mikhualte an nawr. Reds tan hian Mohamed Salah chuan minute 62-naah an goal thumna a lina a thun zui leh. Salah goal thun hnuin goal dang a luh belh thei tawh lova, Liverpool chuan Galatasaray chu si belhkhawmh 4-1 in an hneh a, quarter-final an inhlangkai. Reds hian Chelsea awp mualpho a, last 16 atanga hnawtchhuaktu PSG an hmachhawn zui leh dawn a, quarter-final-ah fiahna hautak an hmachhawn a ngai dawn.
Galatasaray laka Liverpool goal lina thuntu Mohamed Salah khan Champions League-ah goal 50 a thun tling chiah a. UCL a goal thun tam zual zingah 10-na a ni chiah bawk.
Chak chungin Spurs an tla
Thawhleh zana inkhel dangah Tottenham Hotspurs chuan an mikhual Atletico Madrid hneh bawk mah se first leg-a an khelh chhiat an tuar a, Atletico Madrid lakah 7-5 ngawta tlawmin quarter-final an lut zo lo.
Tottenham hian mikhual an nihna hmunah 5-2 ngawta an hneh loh Atletico Madrid hi Xavi Simons goal hnih leh Randal Kolo Muani goal khat thun hmangin an hneh a. La Liga club lian Atletico Madrid tan hian Julián Álvarez leh Dávid Hancko ten goal an thun ve bawk. Mikhal an nihna hmunah 3-2 in tlawm bawk mah se Madrid club lian hian si belhkhawmah 7-5 ion hnehna an chang a, FC Barcelona hmachhawn zui leh turin quarter-final an lut.
Season kal mekah London hmar veng club lian Tottenham an khel chhe viau a, EPL-ah tlak hlauhawm takah an awm mek. UCL-ah chetha bawk mah se Last 16 paltlang zo lovin an tla zui leh a. Kut bengin season an khar ngei dawn tih tihchian a ni nghal bawk.
Liverpool in quarter-final an lut
