Liverpool in Semi-final an lut

December 20, Nilai zan khan English Carabao Cup quarter-final khelh zawh a ni a. Liverpool chuan Anfield-a an mikhual West Ham United chu 5-1 ngawtin an hneh a, awlsam takin semi-final an lut. Reds hian Fulham an hmachhawn zui leh ang.
EPL an khelh hnuhnung berah an elpui leh an hmelma lian ber an hneh zawh loh hnuin Anfield-ah Liverpool an khel tha ta viau. An mikhual West Ham lakah chawlhlawk hmaa goal khat an thun hnuin chawlhlawk hnu lamah goal li ngawt an thun belh zui leh a, nuamsa takin hnehna an chang.
Carabao Cup 2023-24 ah champion tur rinkai ber ni ta hial Liverpool hian an mikhual lakah goal an thun thuai a, minute 28-naah midfielder Dominik Szoboszlai chuan Quansah siamsak atangin hmahruaina goal a thun, Hmahruaina goal an thun hnuin khel tha zui viau mah se chawlhlawk hmain goal dang an thun belh thei lova, si khat faia hmahruai chungin chawlhlawk an hmang.
Chawlhlawk hmain goal thun belh thei lo mah se chawlhlawk hnu lamah Reds in goal an thun belh thuai a, a khat mawi tawkin goal an thun a ni ta deuh ber mai. Minute 56-naah Curtis Jones chuan an goal hnihna a thun a. Jones hian minute 84-naah an goal ngana, an goal hnuhnung ber ni nghal bawk a thun zui leh bawk.
Jones goal thun hnu hian Cody Gakpo chuan minute 71-naah Konaté siamsak atangin an goal thumna a thun. Si thum faia hma an hruai hnuin Reds hian goal khat an chhuah ve zauh. Hammers tan hian minute 77-naah Jarrod Bowen chuan goal thunin an si phurh a sut then. An si phurh an sut then vangin David Moyes a enkawl West Ham United an phur thar hluai naa an phur rei lo viau thung. Mualneitu Liverpool an chhaihkawlh a ni ta deuh ber a, hun tawp dawn hnaihah goal hnih an chhuah zui leh.
3-1 a hma an hruai hnuin Liverpool in goal thun belh ngei tumin tan an khawh zui a, goal hnih an thun belh zui leh. Minute 82-naah Mohamed Salah chuan Trent Alexander Arnold siamsak atangin an goal lina a thun a. Salah goal thun atanga minute hnih hnuh lekah Alexander Arnold siamsak atang vekin Curtis Jones chuan an goal ngana a thun zui leh zat a, hun tawp thlengin goal dang a luh belh thei tawh lo.
An muala awlsam taka hnehna chang Liverpool hian quarter-final atanga Everton hnawtchhuaktu Fulham chu semi-final-ah an hmachhawn zui leh dawn. Team lian pahnih Liverpool leh Chelsea te an semi-final-ah an insut loh hlauh vangin final hmuhnawm zawk a beisei theih dawn a, Reds hi champion tura rinkai zawk an ni ang. Team la dam pali zingah Liverpool hi champion tura rinkai ber an ni mek a. A vawi 14 nan League Cup (Carabao Cup ni mek) ah champion ngei an tum ang.
Semi-final lehlamah harsa taka Newcastle United hneh hramtu Chelsea chuan si thum fai ngawta Port Vale hnehtu Middlesbrough an hmachhawn dawn. Blues hi championship club hmachhawn tur an nih vangin final lut ngei tura ngaih an ni a. Championship club lakah mualpho pumpelh ngei an tum ang.
English Carabao Cup semi-final hi double leg a khelh tur a ni tawh dawn a, January ni 8 ah first leg khelh a ni ang a. Second leg hi January ni 22-zanah khelh a ni thung ang. Carabao Cup hi English League cup tih thin kha a ni a. Sponsor tu Carbao hming an chawi rih a ni.