Liverpool leh Arsenal an inhnehtawk

Pathianni zana English Premier League inkhel hmuhnawm takah champion thar Liverpool leh pahnihna Arsenal te 2-2 in an inhnehtawk. Liverpool leh Arsenal an inhnehtawk laiin Newcastle United in Chelsea an hneh a, champions league an hnaih leh zual. Hetihlai hian Manchester United chu an mualah ngei an lo tlawm ve thung.
Liverpool 2-2 Arsenal
Champion thar Liverpool hian Anfield-a mipui sen vul chuk karah bul an tan tha hle a, goal pawh an thun har lo. Inkhel tan atanga minute 20-naah game liana chetha thin Gody Gakpo chuan Reds hmahruaina goal a thun. Gakpo goal thun vangin Reds an phur thar hluai a, goal lawma mipui au thawm a reh fel hman hma hauhin goal dang an thun belh leh nghal zat. Gakpo goal thun atanga minute khat em pawh a tlin hmain Luis Diaz chuan Liverpool goal hnihna a thun zui leh zat a, Anfield chu lawm vangin a khurhin a khur a ni ber mai.
Inhnaih chilh takin goal chhuah zawn mah se Arsenal an insiamtha thuai a, goal thun tumin an khingpuite an nawr zui nasa hle. Hun rei tak chhung hlawhtling thei lo mah se hun second half-ah an hlawhtling ta nge nge. Gunners tan hian Gabriel Martinelli chuan minute 47-naah goal thunin an si phurh a sut then.
Goal an thun hnuin Arsenal an khel tha chhunzawm a, Mikel Merino chuan minute 70-naah goal thun belh lehin an si phurh a sut. An si phurh an sut zawh vangin Arsenal an phur thar viau a, champion thar Liverpool hneh ngei tumin tan an khawh. Goal thun tuma tan an khawh vanglai takin an si phurh sut zotu Mikel Merino chu minute 79-naah hnawhchhuah a ni. Mikhual an nihna hmunah tlem zawk an nih vangin Gunners tan chet a harsa zui a, chak tum viau mah se uiawm takin an chak zo ta bik lo.
Champion thar Liverpool lakah tlawm an pumpelh vangin Arsenal hian champions league khelh phak an hnaih leh zual sauh. Pahnihna ni chhunzawmin, UCL khel turin an dinhmun tha viau tawh mah se season thara Champions League khel turin Gunners hi an la tling chiang bik lo thung a. An result leh mi dang result-ah an la in nghat tel rih.
Newcastle 2-0 Chelsea
Liverpool leh Arsenal te an inhnehtawk laiin champions league khelh phak tuma tan khawh nasa team pahnih Newcastle United leh Chelsea ten St James Park-ah inkhel hmuhnawm an lo lantir ve bawk. Inkhel pawimawh takah mualneitu Newcastle in 2-0 in hnehna an chang a, champions league khelh phak an hnaih leh zual.
Magpies hian an mikhual Chelsea lakah bul an tan tha viau a, inkhel tan atanga minute hnihna lekah Sandro Tonali chuan hmahruaina goal a thun nghal. Hma taka goal an thun vangin phur viau mah se Newcastle hian goal dang erawh an thun belh thei mai bik lo thung. Chelsea in an si phurh sut tuma tan an khawh laiin an forward Nicolas Jackson chu minute 36-na lekah hnawhchhuah a ni tlat thung. Mimualah si phur zawk ni chunga tlem zawk an nih leh zel vangin Chelsea tan chet a har phah hle.
Inkhel pawimawh takah goal lut a awm belh theih loh reng hnuin hun tawp dawn hnaiah mualneitu an che fuh nawn leh. Newcastle tan hian lmidfielder Bruno Guimarães chuan minute 90-naah goal pawimawh tak a thun a, an chakna a nem nghet. Guimaraes goal thun hnu hian goal dang a luh belh thei tawh lova, Newcastle United hian an elpui lian Chelsea lakah point thum hlu tak an hmu.
An muala an chak vangin Newcastle hian pahnihna an luah chhunzawm a, khelh 36 atangin point 66 an hmu mek a, champions league khelh phak an hnaih deuh deuh zel. Khelh hmabak pahnih chauh awm tawha an chesual viau a nih loh chuan Magpies hian UCL khelh phak theihna hun tha tak an nei mek. Newcastle lakah tlawm bawk mah se Chelsea pawh UCL khel thei dinhmun hniam berah an ding zui a, khelh 36 atanga point 63 hmuin pangana an luah chhunzawm.
United an tlawm leh tawh
Europa League-ah final hial lutin khel tha viau mah se EPL-ah erawh Manchester United leh tlawm an inhmeh riau thung a. An inhmeh thin ang ngeiin United hi Pathianni zan khan an mikhual West Ham United hneh lovin an tlawm zui leh.
Old Trafford a lenglut West Ham tan hian Tomás Soucek chuan minute 26-naah hmahruaina goal a thun a. Goal lut a awm belh theih loh reng hnuin Jarrod Bowen chuan minute 57-naah an goal hnihna thunin Hammers hmahruaina a tihzau belh. United hian an mikhual lakah goal an thun thei lo tluan a, an mualah an tlawm leh ta nge nge a ni.
An mualah ngei an tlawm leh tak vangin English club ropui Manchester United hi table-ah an hnungtawlh hret a, 16-naah an awm mek. EPL atanga Ipswich Town, Leicester City leh Southampton te tlahniam hma hi United tan a vanneihthlakin, a lawmawm tulh tulh.
EPL-ah United ang thova talbuai Tottenham Hotspurs pawh an mikhual Crystal Palace lakah si hnih fai bawkin an lo tlawm ve tho bawk. Tottenham hi 17-naah awmin United aiin an hniam ve leh chhawng a, ‘Chhechhawnga te vai dawr’ tih ang zawng zawng an nei zo. EPL-ah 16-na leh 17-naa awm mek United hi Europa League final-ah an intum dawn teh tlat a. EPL atanga champions khelh phak lo viai viai tak pakhat zawk zawkin season tharah champions league an khel phak nawlh nawn.