Liverpool leh United an chak

Thawhleh zana EPL khelhah team lian pahnih Liverpool leh Manchester United ten hnehna an chang. Reds in si hnih faiin Sheffield United an hneh a. Scot McTominay goal hnih thun hmangin Manchester United chuan Chelsea an hneh ve thung.
Bramall Lane-a lenglur Liverpool hian bul an tan tha hran lova, table mawngphaha awm Sheffield United lakah goal hnih an chhuah hmasa teuh hle. United hian fuh taka an nawr tlang hnuin McAtee chuan goal thun theihna hun tha zet mai a nei a, tibuaitu awm lo mah se Reds si nghak Caoimhín Kelleher a paltlang thei lova, uiawm takin a hun tha a hloh. Hemi hnu hian goal thun theihna hun tha an nei nawn leh a, an hun tha nei chu uiawm takin an hlah zui leh bawk.
Goal hnih an chhuah teuh viau hnuin Liverpool an insiamtha a, goal an thun ta nge nge. Alexander-Arnold corner pet tha leh fing tak chu vengtu nei lo Virgil van Dijk chuan chiang zetin a pet goal a, minute 37-naah hmahruaina goal a thun. Arnold corner pet atang vekin Reds hian goal an thun belh zui teuh hle a, Sheffield United an him ta hlauh thung.
Chawlhlawk hnu lamah inkhel a hmuhnawm chhunzawm a, hma lam pan tura chak mamawh Sheffield an huaisen a, Reds an chhaihbuai ve fo. Goal dang a luh belh dawn lo emaw tih hnuah Darwin Nunez siam tha tak chu fal taka awm Dominik Szoboszlai chuan minute 90+4 ah chiang zetin goal kilah a pet lut a, an goal hnihna thunin, an chakna a nem nghet.
Sheffield United lakah si hnih faia chak Liverpool hian hmahruaitu Arsenal nen an inkar an tizim a, pahnihna an luah nghet. EPL hmahruaitu Arsenal leh Liverpool te hian vawi 15 ve ve an khel tawh a, point hnihin an inthlau mek a ni.
United chak puitu McTomminay
Thawhleh zan hian Old Trafford-ah team lian pahnih; season kal meka beisei phak lo ve ve Manchester United leh Chelsea an inhmachhawn a, Scott McTominay goal hnih thun hmangin United in hnehna hlutak an chang.
Old Trafford ah United in bul an tan tha a, goal thun theihna hun remchang an nei thuai. VAR rawn a nih hnua Antony penalty hlawhchhuah chu Bruno Fernandes-a’n a pet a, Chelsea si nghak Robert Sanchez-a’n a dansak a, an hun tha neih a tihthlawnsak. Hma takah penalty thelh mah se United hian goal an thun thuai tho thung. Minute 19-na lekah Harry Maguire pet Chelsea defender in an dan per chu Scott McTomminay chuan awlsam takin a pet goal a, hmahruaina goal a thun.
Goal an chhuah hnuin Chelsea in an si phurh sut tumin tan an khawh zui a, penalty an beisei ve leh. Box chhungah Raheem Sterling tihtluk si mah se penalty pek an ni lo. Penalty pek an nih loh vangin lungni lo viau mah se chawlhlawk hmain an si phurh a sut ta tho thung. Minute 45-naah Cole Palmer chuan chep tak kar atangin lei hrulah si nghak Andre Onana dan rual lohin a pet goal a, an si phurh a sut.
Chawlhlawk hnu lamah inkhel a hmuhnawm zui viau a, mualneitu chu United in goal an thun leh thuai. Minute 69-naah Garnacho ball vawrh luh tha zet chu Scott McTomminay chuan hnaite atangin a tauh goal a, hma an hruai nawn lehna goal a thun. McTomminay goal thun hnu hian tun laia khel tha tak Garnacho chuan goal a thun teuh hle a, a pet tha tak chu a arh hret a, uiawm takin a goal lo hlauh. Tlawm hreh Chelsea in hun tawp dawnah an si phurh an sut teuh hle a, Fernandez chuan goal post a tauh per hlauh bawk a, an si phurh an sut thei ta lo a ni.
An mualah an chak vangin Manchester United in hma an sawn hret a, paruknaah an inhlangkai. United in hma an sawn laiin Chelsea erawh chu an awmna ngai, 10-naah an awm chhunzawm thung a, hma an sawn hleithei lo chhunzawm zel rih.