LMC-in ‘Mas puala kawn chei
leh bazar siamah hma lak tum lo
Kumin Krismas denchhenin Lunglei khawpuia kawn chei leh Krismas bazar siamah Lunglei Municipal Council chuan hma lak a tum lo.
Lunglei Municipal Council (LMC) Board of Councillors hi Thawhlehni khan an thukhawm a. Chief executive officer Donny Lalruatsanga chuan thu ngaihtuah tura chhawp chhuahte a sawifiah hmasa a ni.
LMC BoC thukhawm chuan Krismas lo thleng tura Lunglei khawpui chhung kawtthler leh kawn chei chungchang an sawiho a. Kumin atan chuan hun a chawpchilh deuh tawh avangin kawn leh kawtthler chei chungchangah LMC anga hma lak loh mai nise, nakkum lamah a hmalam deuha ruahmanna siam tum nise, an ti.
Krismas bazar siam leh siam loh chungchang pawh sawihoin, LMC chairman hoa a kaihhnawih sawrkar department-ten an lo rel tawh angin, bazar hmun bik siam pawh kuminah chuan tih loh nise, an ti bawk.
Hauruang kawnga ‘Riangvaite Thlanmual’ hmun leh a enkawl mawhphurhna chu LMC kuta a awm theihnan hma lak an rel a. Lunglei Municipal Council huamchhunga local council-te chu village council an nih tawh loh avangin sawrkar department hrang hrangten lehkha an tihchhuahah “VC/LC” tia address-a ziak tawh turin department hrang hrang hnena ngen nise an ti.
LMC-in ‘Mas puala kawn chei leh bazar siamah hma lak tum lo
