LMC inthlan campaign hun tawp ta
Thawhtanni tlai dar 4 khan Lunglei Municipal Council (LMC) inthlan campaign hun a tawp a, LMC huam chhunga mi ni lo, campaign-a Lunglei-a awmte pawh Lunglei chhuahsan tura ngaih an ni.
Nilaini-a vote thlak tur LMC inthlanah hian candidate 41 an awm; MNF, Congress leh ZPM te’n bial (ward) 11-ah candidate an nei kim a, BJP-in pakua an nei. BJP hian candidate 11 an nei a, pahnih chu kumah an lo tlin loh avangin hnawl an ni.
Ward pathum chu hmeichhe tana hauh a ni a, ZPM-in mipa leh hmeichhia, a tu zawk zawk tan pawha din theihah hmeichhe candidate pakhat an nei.
Lungleia chanchinbumite chuan MNF, Congress leh ZPM te’n sorkar theih an inbeisei theuh tih an sawi; MNF-in sorkarna tur tawk vel an tlin an ring a, ZPM-in sorkar thei tur tawk vel tlin an beisei bawk a, Congress party-in pasarih emaw paruk emaw tlin an beisei an ti.
Thawhtanni chhunah khan MPCC president Lalsawta’n thuthar lakhawmtute a kawm a, zawhna chhangin pasarih an tlin an ring a, mahse pakhat hi an zam leh deuh tiin a sawi.
Lunglei chanchinbumite hian boruak a dai tih an sawi a, kar hmasa tawp lam atang khan boruak hi a kang a, campaign tawp ni-ah chuan a kang hle an ti.
Campaign tawp ni-ah hian MNF-in an party office-ah campaign an khar a, ZPM-in Mizofed dawr kawtah campaign an khar; Pukpui leh Zobawk atangin kawng an zawh a, Mizofed dawr kawtah hian intawkkhawmin hun an hmang a ni. Congress party chuan campaign kharna hun an hman bakah an president-in thuthar lakhawmtute an kawm.
LMC inthlan campaign hun tawp ta
![](https://theaizawlpost.org/wp-content/uploads/tap_logo-min-large.jpg)