Lunglei Municipal Council hmasa ber inthlan hun atan State Election Commission Mizoram chuan tun thla ni 29 a ruat a. Ward 11 atangin ward 4 chu hmeichhe tana hauh a ni.
State election commissioner Laima Chozah chuan LMC inthlan hun tur hi Ningani khan Lungleiah a puang a. Vote hi 2023 March 29 zing dar 7.00 atanga tlai dar 4.30 thleng thlak theih a ni anga, April 4-ah vote hi chhiar a ni ang. Inthlan hun puan hi chawhnu lam a nih avangin, vawiin – March 3 atang hian Lunglei Municpal huamchhungah election model code of conduct hi hman tan a ni ang.
Inthlan puan a nih hma hian LMC ward-a hmeichhe ward tur pawh a ni a. Seat awm zawng zawng atanga zaa 33 hauh a nih angin, seat 4 hauh a ni a. Lunglei khawpui chhunga Assembly constituency pali – Lunglei North, Lunglei East, Lunglei West leh Lunglei South huamchin atangin pakhat theuh pawh niin, reserved ward pawh te chu – Ward II (Serkawn, Zohnuai), Ward VIII (Ramthar, Farm Veng), Ward V (Sazaikawn, Hauruang, Rahsiveng) leh Ward X (Sethlun, Luangmual, Theiriat, Hrangchalkawn) te an ni. Hmeichhe ward tur hi MHIP, YMA, MUP leh MJA aiawhten an pawt a ni.
State election commissioner chuan ram danpui leh Mizoram Municipalities Act 2007 hnuaia ram leh tualchhung inrelbawlnaa hmeichhiaten chanvo zau zawk an neih theihna’na an tana seat hauhsak a nih dan a sawi a. SEC chu ram danpui hnuaia din, constitutional body a nih angin hmalakna leh ruahmanna reng reng mipui hriat tur chu felfai leh langtlang taka an tih thin thu a sawi a ni.
LMC inthlana chuh tumte tan March 10 thleng nomination file theih a ni a, March 13-ah nomination paper endik a ni ang; candidate inhnukdawk duh tan March 14 chawhnu dar 3.00 thleng hawn a ni. March 15-ah candidate-te symbol tur tlangzarh a ni ang. LMC huamchhungah hian polling station 44 a awm a ni.
LMC inthlan hun March 29 Hmeichhe ward 4 awm dawn
![](https://theaizawlpost.org/wp-content/uploads/2023/03/lmc-1024x574.jpeg)