Site icon The Aizawl Post

LMC vice chairman leh EC thar lalut

Lunglei Municipal Council vice chairman K Lalrinawma’n banna a thehluh pawmsak a nih hnua LMC chairman Lalzuithanga’n vice chairman thar atana a ruat, Ward No. IX councillor Zorinsanga Hmar leh executive councillor thar atana a ruat, Ward No. VI councillor R Lalremsiama te chu Thawhlehni khan Lunglei additional district magistrate (ADM) Rochuangkimi Khenglawt chuan rinawmna thu tiamtirin a lalut.
LMC vice chairman leh executive councillor thar lakluh inkhawm hi LMC chief executive officer HD Lalpekmawia’n a kaihruai a. Mizoram Municipalities Act 2007 Section 14(2) leh Mizoram Municipalities (Procedure & Conduct of Business) Rules 2007 Rule 33 tlawhchhana inruatna LMC lehkha a chhiar chhuah hnuah Lunglei ADM hian vice chairman leh executive councillor atana ruat tharte hi thu tiamtirin a lalut a ni.
LMC chairman chuan, LMC vice chairman K Lalrinawma chu political party lamah mawhphurhna pawimawh dang a chelh a ngaih avangin LMC Executive Council insiamrem a ngai a, vice chairman kal chhuak ta hoin thawhhona tha tak neiin, hmasawnna hrang hrang hmuh a ni chu lawmawm a tih thu a sawi. Vice chairman leh executive councillor tharte chu LMC councillor-ten inpawh tlang taka an sawiho hnua lungrual taka an pawm tlan an ni, tiin, an mawhphurhna tha taka an hlen chhuah a, LMC-in hmasawnna nasa zawk a hmuh zel a beisei tih a sawi a ni.
LMC atanga bang ta K Lalrinawma hian party lama mawhphurhna pawimawh a neih avangin kumin November 2 khan LMC chairman hnenah vice chairman atanga banna a thehlut a. A banna thehluh hi pawm a nih hnuah November 10 khan LMC Board of Councillors thukhawm chuan Executive Council insiamrem dan tur leh kal zel dan tur ngaihtuahin, he thutkhawm thutlukna leh danin thuneihna a pek angin LMC chairman hian November 16 khan vice chairman thar atan Zorinsanga Hmar leh executive councillor thar atan R Lalremsiama te a ruat a ni.

Exit mobile version