February 14-a lo neitu pawl leh sorkar inbiakna tura ruahmanah sorkar laipui aiawh hian union minister pahnih emaw an tel mai thei a, Punjab leh Haryana-a sorkar aiawh pawh an tel dawn tih hemi lam hre chiang pakhat chuan a sawi.
Lo neitute hian sorkar laka an phut thil 13 lo thlen tumin an inbuatsaih mek bawk a. Heng zingah hian an thlai thar hralhna man hniam ber (minimum support prices – MSP) bituksak tur leh an loan lak ngaidam tura ngenna pawh a tel.
Sorkar laipui aiawhte zingah hian sorkar hnathawk liante pawh an tel dawn a, lo neitu pawlte hnenah hian sorkarin ruahmanna a siamin an sum lak luh leh an thlai thar a tihpun dan turte an sawipui dawn nia sawi a ni.
“Dan anga MSP neih kan duh a. Sorkar hian Chandigarh emaw, state chhung hmun remchang dangah emaw inbiak an duh a, keini hian Delhi-ah ngei inbiak kan duh,” tiin Sanyukt Kisan Morcha (Non-Political) peng pakhat, Bharatiya Kisan Union (Dalewal)-a member, Gurdeep Singh Chahal chuan a sawi.
MSP hi sorkarin thlai thartuten an hmuh chhiat lutuk loh nana a leisak theihna hniam ber a tuk thin a ni a. Sorkar hian hemi ang hian thlai thenkhat a leisak thin a, chu chu mi mala leitute pawhin an leisakna a ni ve nghal thin a. An leisak thlai bikah chuan awmzia awm hle mah se sorkar hian ni tin ei tur lam chi chauh a hlawmin a leisak thin thung.
Kar hmasa khan sorkar hian lo neitu lungawi lote hruaitu ber, SNM(NP) leh Sarwan Singh Pandher-a kaihhruai Kisan Mazdoor Sangh te chu inbe tur hian ruahmanna a siampui a. “Thil phut 13 kan tichiangtawh a; mahse, hengte hi ennawnin kan belh thei bawk,” tiin an hruaitu pakhat chuan a sawi.
An pawl hian lo neitute loan lak ngaihdam leh boruak tibawlhhlawhtu zinga chhiar tel loh an phut bawk a. Lo neihna thil hian India ram sum thawh chhuah 18% chuang a tum a, lo neitute chuan nthil man sang zel leh hlawk taka hralh theihna an nei lo chuan an lak luh a tihniam zel niin an sawi.
Sorkar pawh hian kum (season) tin MSP hi a ennawn ziah a, thar chhuah nana an sum sen let 1.5 vela sangin a tuk thin tlangpui a. Lo neituten an thlai chin leh enkawl leh tharna atana an sum sen zawng zawng zahve tal an hlep tur angin a ruahman thin tihna a ni a. Hetih lai hian lo neitu pawlte chuan sorkar hian thlai chinna atana senso an chhut dan hi a hlawm a lian lutuk a, a lan ang ang hlep phak lo thin niin an sawi ve thung.
Lo neitute hian man tlawma power lak theih an phut bawk a, hei hi anmahni kut ngeia dawn an duh bawk a. Hei bakah hian India chu lo neih kaihhnawih thil hrim hrimah World Trade Organisation (WTO) atanga an inhnuhdawh an phu bawk.
“Lo neihna thil hian a ruala siam that, sum pek, hralhna tur an bithiah leh man tlawma thil pek a ngai a. Thil pakhat chin fel hian a dangah tangkaina a nei chuang lo. Lehlam lehlam hi a chin fel dan tur a huhova an tiha an indawr tawn a ngai a ni,” tiin economist K Mani, Tamil Nadu Agricultural University-a professor thin chuan a sawi.
Lo neitute leh sorkar inbiakna turah union minister tel dawn
