Lokayukta-in mi 4 thiam loh chantir
Kum 209-a din a nih atangin Mizoram Lokayukta hnuaia thubuai ngaihtuahnaah mi pali chu thiam loh chantir an ni tawh.
Lokayukta Act 2014 Section 47-in a phut angin, Mizoram Lokayukta chairperson Lalmalsawma chuan larsap Gen Vijay Kumar Singh (Retd) hnenah Mizoram Lokayukta Fifth Annual Report 2023- 2024 chu Thawhlehni khan Raj Bhavan-ah a hlan. Annual report hian 2023 April 1 atanga 2024 March 31 inkar a huam a, Mizoram Legislative Assembly-ah pharh a ni dawn.
Larsap chuan Mizoram Lokayukta chairperson bakah member pahnih – Lalsanglura leh Joel Joseph Denga te chu an hmalakna hrang hrang sawipuiin, chairperson-in Mizoram Lokayukta dinhmun leh hmalakna tlangpui a sawi. Mizoram Lokayukta hnuaia case neih dan leh bawhzui dan bakah dinhmun leh thlen chin an hrilh a ni.
Annual report tarlan danin, kum 2023- 2024 chhung khan Mizoram Lokayukta hnuaiah eirukna thubuai case 8 ziahluh a ni a; heng case 8 hi preliminary inquiry tura tih niin, heng zinga case 7 report hi dawn a ni tawh. March 2019-a Mizoram Lokayukta din a nih atanga kumin February 10 thleng khan Mizoram Lokayukta hnuaiah case 71 ziahluh tawh niin, heng zinga case 46 hi chhuizui tlaka ngaih a ni. Case hearing tum 38 neih tawh a ni a, thiamloh chantir 4 leh thiam chantir 1 an awm tawh. Department proceeding tura tih case 3 a awm tawh bawk.
Lokayukta-in mi 4 thiam loh chantir
