Kan ramah eirukna a hluar kan ti a, kawng kan zawh mup mup a, kan tawngtai rual a, sai ip puan kan sin a, social media-ah kan sawi sup sup a, kan vei a, kan hua a, kan phun a, kan thinrim a.
Mizoram Lokayukta Act, 2014 kan nei a, a hnu kum 5-naah 11.3.2019 khan a function ve chauh a. Kum 4 a han liam a, January 31, 2023 thleng khan Mizoram Lokayukta hnuaiah eiruk thubuai 47 ziah luh a ni.
Hun a han liam leh deuh a, nimin mai khan sawrkar thuchhuahin a tarlan dan chuan, Mizoram Lokayukta a din tirh atanga thubuai lut zat chu 77 a ni a, chhui lailawk 55 a awm a, heng zinga 26 chu chhui puitlin tawh a ni.
Chuti a nih chuan, January ni 31, 2023 leh April 16, 2025 inkar kum hnih leh thla thum chhungin case 30 (77-47) a luh belh leh tawh tihna a ni. A din tirh atanga vawiin ni thlenga thubuai lut hi 77 a nih chuan, kum 6 chhung hian chawhrualin kum tin thubuai 12.7 a lut a, thla tin case pakhat lek a lut tihna ang a ni bawk.
Mizoram Lokayukta report atang hi chuan, thubuai lut zat leh chhui mek zat te, chhui zawh tawh te a lang a, chutih laiin, mi engzat nge thiam loh chantir awm tawh a, engtia hrem nge an nih hlawm tih erawh report-ah hian tarlan a ni lo thung.
Eng pawh ni se, eirukna kan huat dan leh kan duhlohna kan lantir thin dan ngaihtuah hi chuan, eiruk thubuai chhuitu Mizoram Lokayukta-ah hian thla tin complaint hi lut ruih ruih reng awm tak a ni a, mahse chu chu a ni hauh si lo. Chutih rual chuan, Lokayukta ber lah hi chak taka hna thawk thei turin kan thuam chak tha duh leh der bawk si lo. Mipui lam hian complaint an ngah lo bawk a, Lokayukta hi thuam chak vak a ngai lo e an ti ni maw…
Dan siam lamah hi chuan kan ziaawm phian, kan siam ve leh mai thin. Chutih laiin a nihna tur anga Dan hman tangkai (implement) kawngah kan vuaicha leh lawi a. Chutih rualin, mipui lam pawhin dan siam tura kan aiawha kan thlanchhuahte Dan siam hi kan bengkhawn zui leh em em lem hlei lo a, chutih laiin social media lamah kan phunchiar leh viau lawi si a.
Eirukna hi kan haw takzet a nih chuan, kawngzawh leh kawtthlera aurual dual dual ringawt hi a ni lova, a tak (practical)-in kan do tur a ni a, a point-ah tak tum chat chat kan tum tur a ni a, chu ta pawimawh chu Lokayukta hman tangkai hi a ni.
Lokayukta leh mipui
