Lokayukta leh MPSC member lalut

Mizoram Lok Ayukta member leh Mizoram Public Service Commission (MPSC) member tharte chu larsap Dr Hari Babu Kambhampati chuan Ningani khan a lalut.
Lokayukta Judicial member ruat thar hi Joel Joseph Denga, MJS retired a ni a; MPSC member ruat thar hi K Lalhmingliana, MCS retired a ni.
Lakluh inkhawm kaihruaitu chief secretary Dr Renu Sharma chuan appointment order a chhiar chhuak hmasa a, larsap hian an pahnihin rinawmna thu tiamtirin a lalut a ni.
Lakluh inkhawmah hian chief minister Lalduhoma, Assembly speaker Lalbiakzama, minister leh MLA-te bakah mi pawimawh dangte an tel a ni.
Lokayukta Judicial member thar Joel Joseph Denga hian thiamna lamah BA, LL.B degree a nei a. Kum 1998 atang khan advocate hna a thawk tan a, 2011 May 24 khan Mizoram Judicial Service-ah lutin, Law & Judicial department-ah hna pawimawh hrang hrang a thawh hnuin 2014 February 26 khan Mizoram State Legal Service Authority member secretary hna a chelh a. 2018 January 12 khan District & Session judge-ah a kaisang a, NIA Special Court judge, District & Sessions judge Lunglei leh Aizawl, Gauhati High Court Aizawl Bench registrar a ni tawh bawk. Lok Ayukta member atana ruat a nih lai hian District & Session judge Aizawl hna a chelh mek.
MPSC member thar K Lalhmingliana hian BSc (Hons) degree a nei a. 1998 April 1 khan Mizoram Civil Service-ah a lut. Mizoram hmun hrang hrang leh department hrang hranga hna a chelh hnu ah DM&R, LAD leh Fisheries joint secretary; LR&S leh LESDE director; FCS&CA, C&I leh LESDE addl. secretary a ni tawh. MPSC member-a ruat a nih lai hian AMC municipal commissioner a ni mek.