Sorkar thar hnuaiah Lok Ayukta tihchangtlunna sawi tur a la awm lo a, thawktu (Group D) pakhat lak a nih bak Lok Ayukta-ah hmasawnna a la awm lo niin a lang.Lok Ayukta ding lai hi hnathawk thei lovah puhin “Lok Ayukta hi hna thawk thei tûra tihchangtlun a ni ang,” tiin ZPM-in an inthlan manifesto-ah an ziak a ni.
ZPM kaihhruai sorkar pian hnuah Lok Ayukta thuam chak/tihchangtlun a ni em tih, RTI hmanga zawhna chu Lok Ayukta lamin “Sorkar thar a lo pian hma atang pawhin Lokayukta hi thuam chak/tihchangtlun tum reng a ni a, chutiang tur chuan a theih ang anga hmalak a ni,” tiin an chhang.
Sorkar thar pian hnuah Lokayukta hian thil chhui thei tura thuneihna a nei em tih zawhna pawh “Lokayukta hian din a nih atangin thil chhui thei tura thuneihna Mizoram Lokayukta Act, 2014 Section 28 hmangin thuneihna a nei nghal a ni,” tiin an chhang.
Lokayukta hian ama pualin thil chhuitu tur (investigation wing) a nei ang tih te sawi thin a ni a, mahse Lokayukta hian vawiin thlengin chutiang a la nei lo.
“Mizoram Lokayukta hian din a nih atanga vawiin thlengin ama pualin investigation wing a la nei lo a, din a nih tirh atangin vawiin thlengin investigating agency atan Anti-Corruption Bureau (ACB) la hmangin CBI-ah pawh case refer a ni tawh bawk,” tiin RTI hmanga hemi chungchanga zawhna an chhang.
Sorkar thar lakluh ni khan Raj Bhavan Durbur Hall-ah thuthar lakhawmtute kawmin chief minister Lalduhoma’n ni 100 chhunga an tih tur a puang a, chutah chuan Lokayukta thuam chak hi a tel. ZPM inthlan manifesto-ah pawh “Ei rûkna tibo tûra nasa taka hma lâk a ni ang a, Lok Ayukta hi hna thawk thei tûra tihchangtlun a ni ang,” tia ziah a ni a, sorkar thar lakluh nia thuthar lakhawmtute a kawm khan chief minister hian, “Kan manifesto-te hlawhtling se an duh avangin mipuiin min vote tling a ni,” a ti.
Lokayukta tihchang- tlunna la awm lo
