Loneitute him nan hma la dawn : Rahul

Congress leader Rahul Gandhi chuan INDIA alliance chu thlan tlin an nih chuan loneitute aiawha dingin an him theih nan policy siam a ni ang a ti.
Maharashtra a Nashik district a Chandwad a farmer’s rally a niehah NCP (SP) head Sharad Pawar leh Shiv Sena (UBT) MP Sanjay Raut te pawhin telpuiin hei hi ‘Bharat Jodo Nyay Yatra’ kal zel a ni bawk.
“INDIA alliance sorkar a piang a nih chuan loneitute aiawha dingin in duh te humhimsakin in awm ang” tiin Gandhi chuan a sawi a.
Loneitute loan ngaih dam tiamin cultivator te hlawk nan crop insurance scheme kalpui te, export import policy siamah crop price him nana ruahmanna siam te leh GST atanga agriculture tih tel ve loh te kalpui a ni ang a ti.
Wayanad atanga Lok Sabha member chuan Congress te chuan Swaminathan committee report angin minimum support price (MSP) legal guarantee an pek tur thu a sawi bawk.
Congress president hlui chuan India rama mi 20 atanga 25 lek hausakna chu India mipui 70 crore vel te hausakna belhkhawm nen a inhen reng a ti bawk a.
Narendra Modi sorkar chuan a industrialists thian te leiba Rs 16 lakh crore a ngaihdam sak a ni a ti bawk a. “A loan ngaihdam sak hi Mahatama Gandhi National Rural Employment Guarantee Scheme (MNREGA) scheme a kum tin kum 24 chhung mirethei te hnena hna pek nana Rs 35,000 crore sen nen a inhen reng” tiin a sawi bawk.
Congress kaihhruai UPA sorkar khan loneitute leiba Rs 70,000 crore a ngaidam tiin a sawi bawk a. “Mihausa te loan ngaihdam theih chuan loneitute loan ngaihdam a hmasa zawk tur a ni” a ti bawk.
Agnipath scheme nataka sawisel bawkin Agniveers te chuan pension an nei lo ang a, martar pawh an ni thei lo, thlaruk chauh training an la dawn bawk a ti a. “Sipai te chu kan ramri veng a, loneitu chuan ram chhungah khua leh tuite min veng him a ni. Kan sipaite leh loneitute kan humhim theih loh chuan ramin hma a sawn thei lo,” a ti bawk.
NCP (SP) leader Sharad Pawar pawhin centre sorkar sawiselin loneitute leh agriculture sector ngaihsak lo a ti bawk a. “An thlai thar te man a man si lo, leiba ngah bwk si avangin an intihlum a. UPA sorkar kha chuan loneitute loan Rs 70,000 crore a ngaidam” tiin a sawi a. “Anti-farmer, anti-youth sorkar inflation tisang tu ni bawk tihtlak hi kan vaia mawhphurhna a ni” a ti bawk.
Shiv Sena (UBT) leader Sanjay Raut pawhin rally ah hian thusawina a nei bawk.