Loneitute tana tui harsatna awm
sutkian dan Union MoS sawipui
Mizoram tlawhtu Union minister of state for Jal Shakti Raj Bhushan Choudhary chu Ningani zing khan Irrigation and Water Resources PC Vanlalruata chuan a thlenna Lok Bhavan-ah a hmu.
I&WC minister hian Mizoram-in ruahtui dawng tha viau mah ila, a dah khawlna kan neih that loh avang leh tlangram chhengchhe tak kan nih avanga tuia harsatna kan tawh dan a sawifiah a, tui dahkhawlna tha zawk, tuikhuah hmanga irrigation project kan neih theihnan hma lakpui turin a ngen.
Mizoram-in leihnuai tui verh chhuah (irrigation) kan hlawkpui zia sawiin, he project hi tih tawp tumna a awmnia a hriat chu chhunzawm zel turin a ngen tih a sawi a. Mizoram chu tlangram a nih avangin loneitute hnena tui pekna senso (cost per hectare) chu tlangram tan chuan a beitham a, a bik taka hmarchhak state tan ennawn sak turin a ngen bawk.
Union minister for Jal Shakti hnena chief minister Pu Lalduhoma’n lehkha a lo ziah tawh, I&WR department-in detail project report a siam – Mat Valley Integrated Project cheng vaibelchhe 274.25, Bramaputra Board-a an thawn thlak tawh chu enzui sak a, a rang thei ang bera sanction tura a ngen bakah solar pump leh PMKUSUM hmanga tlangram tui pekna rate hniam bik pawh tisang turin a thlen bawk.
Mizoram leh tlangram dangte nena hman tangkai tur – National Hill Water Security Mission din a, tlangram ho tuia harsatna sutkian dan pawh ngaihtuah sak turin Union MoS hi a ngen a. Delhi-ah secretary-te lo sawipui a tum thu in a chhang. Hun remchangah Mizoram lama a enkawltu department nen chiangkuang zawka sawiho hun ruahman a tum tih a lo hrilh a ni.
Loneitute tana tui harsatna awm sutkian dan Union MoS sawipui
