Lawngtlai East bialah Dr Lorrain Lalpekliana Chinzah leh Alinery
Lalngilneii Lianhlawng te’n din an tum ve ve tih a chiang a, ZPM ticket-a din an tum ve ve tih pawh a chiang. Hemi chungchang hi Lawngtlai velah chuan titi a tling a, chumi pawn lamah pawh titi a tling mek.
Langchang takin anni pahnih hian theihtawp an chhuah ve ve a, Aizawla ZPM hruaitute thu leh hla erawh hriat a ni rih lo.
Lorrain-a hi LADC-ah independent ticket-a MDC-a tling a ni. ZPM ticket-a MLA inthlana ding tur hian Aizawla ZPM hruaitute thu a hmu tih thu dawn a ni. Alinery pawh hi Aizawla ZPM hruaitute thu hmu bawkin a zin kual ve bawk.
Kar hmasa Ningani khan ZPM LADC Committee te’n an pahnih karah hian vote an la a, Alinery hian vote 14 a hmu, Lorrain-a’n vote 10 a hmu.
Mahse hei hi pawm leh pawm lo an awm a, vote laknaa tel tur an inhrilh kim lo nia sawi a ni. Vote hmanga buk an nih lai hian Lorrain-a hi ZPM hruaitute nena an zin chhuah lai a ni nghe nghe. Vote lak hi Aizawla an hruaitute thu hmuin an ti nia sawi a ni.
Chumi hnu chuan LADC Committee hruaitu thenkhat chu insawifiah tura tih an ni a, a hnu lawkah hei hi an sut leh nghal.
Lorrain-a hi medical doctor a ni a, a (MDC) bial fannaah pawh dam lote a en thin avangin ngainat a hlawh nia sawi a ni. Chutih laiin Alinery hian Lawngtlai-a ZPM office luah man a tum nia sawi a ni a, hemi chungchanga biakpawh ZPM hruaitute chuan hei hi a dik tih an sawi. Chuvang chuan ani pawhin ngainat leh ngaih pawimawh a hlawh nia sawi a ni.
Lawngtlai atanga thu dawn danin, party chhungah tantu an nei hraw ve ve a, ngaih pawimawh pawh an hlawh ve ve. Aizawl-a ZPM hruaitu lawkteah pawh tantu hi an nei ve ve a, Aizawla an hruaitute thu hmua che an ni ve ve. Alinery hi hruaitu lawkte’n Lawngtlai East biala zin kual phalna an pe a, hei hi GAD-in an remti loh zet hnuah hruaitu dangina phalna an pek a ni tih thu dawn a ni.
An pahnih hian theihtawp an chhuah mek a, Aizawla ZPM hruaitu lawkte’n hemi chungchang hi an la ngaihtuah lo nia hriat a ni.
Lorrain-a VS Alinery
