LPG ni 5 daih, petrol ni 7 daih
Ni khata kan hman dan tlangpui chhutin, mipui nawlpuiin an hman eirawngbawlna gas domestic bur semchhuah tur awm mek chu ni 5 daih a ni a, petrol bikah ni 7 daih a ni.
West Asia indona avanga gas leh oil lakluh kawnga harsatna awm mek karah tuna Mizorama sawrkarin a chhinchhiah chinah April 7 thleng khan LPG domestic (kg.14.2) stock mek bur 13801, kawnga rawn thang mek bur 25608 nen chhiar telin bur 39409 a awm a, hei hi dan pangngaia semchhuah thin anga chhut chuan, a dang rawn thlen belh miah loh pawhin ni 5 chhung Mizoram pum daih a ni.
Commercial (kg.19) bur pawh stock mek 512, kawnga thang mek bur 312 awmin, a vaia bur 824 awm hi ni 14 daih tura chhut a ni.
Hetiang bawka chhut hian petrol (MS) stock mek kilo litre 1289.80, kawnga thang mek KL 373 nen a vaiin KL 1662.80 a awm a, hei hi ni 7.02 min daih tura chhut a ni. Diesel (HSD) pawh stock KL 1492.00, kawnga thang mek KL 435, a vaiin KL 1927.00 awmin, ni 5.85 daih pha tura ngaih a ni.
‘Tun dinhmunah LPG leh tuialhthei hi a thleng tha a, mipui tan chiai-na tur a awm lo,’ FCS&CA department thuchhuak chuan a ti.
LPG ni 5 daih, petrol ni 7 daih
