LPS Cup semi-final khel tur an chiang kim

Nilaini zanah Mahindra XUV3OO LPS Cup quarter-final khelh zawh niin, zanin leh naktuk zan hian semi-final first leg khelh a ni ang.
Kawnpui Joint VC
1-0 Armed Veng LC
Kawnpui Joint-in hnehna chhinchhiahtlak changin Nilaini zanah champion lai Armed Veng lakah sikhat faiin hnehna an chang a, Mahindra XUV3OO LPS Cup semi-final an lut.
Rajiv Gandhi Stadium, Mualpuiah Kawnpui top scorer Lalkrossmawia’n hun bul lamah a khung a, harsatna lian tawk loin an humhim.
Vawihnih champion tawh Armed Vengin an khel tha lo a, quarter-final an paltlang zo ta lo a ni.
Aizawl district pawn atanga sawm bik team pali zinga semi-final lut awmchhun Kawnpui Joint-in Vaivakawn an hmachhawn zui dawn a, quarter-final inkhel hnuhnung berah Vaivakawn hian goal hnih goal khatin vawithum champion tawh Ramhlun South an hneh a ni.
Kawnpui midfielder Joseph Lalrinawma’n khelmual lai a luahlum thain, goal nawr leh venah a thawhhlawk a, Divya Player of the Match a nih theihna atana pawimawh tak atan goal thawkchhuaktu zingah a te.
Minute 17-ah a ball pek lain Laldinsanga’n vei lam sir atangin a vawrh a, Mawitea’n nalh takin a tauhlut. Goal hlu tak a thun mah se Kawnpui forward hian hat-trick siam thei hial tura hun tha a neih erawh a tihlawhtling tawk lo.
A hmain Armed Veng keeper KC Vanlalruatdika’n a ball pet a dansak tawh a, second half-ah tauh lut nawn thei tura ngaih a nih laiin goal pawnah a chhuak a, hun tawp hma chiahin hun tha bawhpelh bawkin a pet tha lo hle a ni.
Goal dang thun belh lo chungin Mawitea’n team tan goal hlu tak a khung leh a, a hmain goal thum goal khatin Salem Veng an hneh a, goal khat ve vea an inhnehtawk laiin a tauhlut tawh a, tournament kal mekah goal nga a thun tawh a ni.
Armed Vengin khelmual laiah ball chang hnem viau chungin goal hlauhawm siamchhuah an harsat a, Kawnpuiin an dan hneh avangin khung ngei theihna hun tha nei miah lovin hun an hmang ral.
First half chhungin captain Lalbiakhlua’n penalty box pawn atangin goal zawn loah a pet chhuak a, a hnuah Joseph Lalruatfela pet chu Kawnpui goal veng Lalhruaitluanga’n a mansak bawk.
Goal hlauhawm ngah zawk Kawnpuiin champion thei turin theihna an nei tih an lan tir bakah YMA football-a vawinga cham pion tawh Armed Vengin tun tournament chanchina champion hnem ber leh trophy tum thum la tawh Ramhlun South nih rual an tumna kawng an tihtawpsak tel nghal a ni.
Irinni zan semi-final first leg-ah khua leh veng inelnaa sulhnu nei tha Ramhlun South hnehtu Vaivakawn hmaah thawm lian zawk, tawiawmtu mipui tam zawk nen an inlan dawn tih coach Malsawmkima’n a sawi.
Vaivakawn LC 2-1 (AET) Ramhlun South LC
Si phur hmasa Vaivakawn tan Lalthanzuala’n vawihnih a khung a, Nilaini zan Mahindra XUV3OO LPS Cup quarter-final inkhel hnuhnung berah goal hnih goal khatin Ramhlun South an hneh.
Rajiv Gandhi Stadium, Mualpuiah tum thum champion tawh Ramhlun South tan a vawikhatna’n Mizoram striker Malsawmfela’n a khel a, minute 10-ah a corner pet atangin defender Lalmawizuala’n a tauhlut.
Chawlhlawk hmain Thanzuala’n an siphurh a sut a, Lalrinhlua ball pek tha tak um falin a chhuihlut a, goal dang luh belh loin hun pangngaiah goal khat ve vein an inhnehtawk.
Mnute 30 hun pek belh an khelh chhunzawm a, minute 97-ah a hma ang bawkin vel lam atangin Rinhlua’n tha takin a vawrh leh. Thanzuala’n umlutin a lak rem hnuah goalkeeper Vannunmawia dan theih lohin a pet lut a, a vawikhatna’n Vaivakawnin semi-final an lut.
Inkhel boruak a sang a, hun pangngai tawpna’n minute khat a la awm tihin Vaivakawn coach Lalruatliana Sailo chuan a tawngkam vangin red card a chawi a; minute 115-ah Ramhlun South player C. Lalrintluanga’n a vawihnihna’n yellow card chawiin hnawhchhuah a ni bawk.
Khua leh veng inelna hlun YMA football final-ah vawihnih Vaivakawn an inlan tawh a, kum 2000 kha a hnuhnung zawk niin, Aizawl District F ootball Association buatsaih inter village football final luh inchuhin Kawnpui Joint nen an inhmac hhawn zui ang.
Champion hnem ber leh vawithum trophy la tawh Ramhlun South-in tournament hnuhnung ber kum 2019 khan semi-final pakhat zawkah Republic Veng an hneh lo a, tun tumah quarter-final an paltlang zo ta lo a ni.
A hmain Bethlehem lakah si nga faiin Ramhlun South an chak a, player langsar Sawmzela an neih belh hnuah Mawizuala’n rei an inkhelh hmain Vaivakawn lakah goal a khung a, rin an hlawh hman hle.
Vaivakawnin beiletin inpumkhat tha takin an khel a; minute 35-ah Thanzuala’n an si phurh sutin, a hnu lawkah Vanlalhriata’n a thun belh teuh hle a, freekick tha takin a pet a, goal kham a per.
Tun tournament-a goal thum thun tawh Ramhlun South forward Danny Zorammawia’n tum hnih hlauhawm theiin pet mah se keeper Lalhruaizela’n a dansak ve ve a; Divya Player of the Match Vaivakawn centre-back David Lalrinpuia leh a hote’n Sawmfela leh Ramhlun South tlar hma tha takin an veng.
Rinhlua siamsak ve ve hmangin Thanzuala’n goal hlu tak a thun a, tournament kal mekah goal li a khung tling tawh a ni.
A kawppui Benjamin Lalnunpuia’n goal nga a neih sa tipung turin minute 120 hnu hun pek belhah remchang a hmu a, pet chhe lo mah se Vana’n a dansak.
Hun tawp hma chiahin Sawmfela ball pek tha tak atangin captain Lalremruata’n hun tha a nei a, goal zawn loah pet chhuakin Ramhlun South zin kawng a tawp zui ta a ni.