Tarlan tawh thin angin, thla thar, August ni 26, Zirtawpni zan khian HC Johnkenty Vanhlimpuia leh amah chotu R. Malsawmtluangate chu LPS Arena, Falkland-ah round li chhung an inhnek dawn a, mipui ngaihven hlawh Vana’n hruihrual chhunga a la hmachhawn ngai loh Mala chungchang hriatthiam harsa a tih thu sawi chungin Bosch Home Appliances LPS Fight Night-ah inhnek hmuhnawm an lantir theih erawh a beisei.
2019 LPS Pro Fight lightheavyweight title a lak hnua Mizorama la inhnek leh ta ngai lo Tuipui boxer chuan, “Mala nen kan vawikhat intawnna tur a ni a, engnge thleng dawn tih ka hrethiam mai rih bik lo. Cho tur dang a hre lo a, min cho ta mai niin ka hria,” a ti.
Nikum November thla khan India ram puma sipai inelna Inter Services Championship lightheavyweight-ah kum 27 mi Vana a champion a, Indian Navy boxer chhuanvawr hian zing, chhun, tlaiah ngawrh taka a inbuatsaih reng avangin a inringtawk tih a tarlang tel.
Feet 5 leh inchi 11-a sang Vana chuan sawizawmin, “Tum tham tak ni turah ka ngai a, thil thleng tur a hriat loh. Inhnek hmuhnawm tak lantir thei ila a tha ngawt ang,” a ti.
Kum 2014 khan rawlthar kum 17 mi a nih laiin a vawikhatna’n LPS Pro Fight middleweight-ah Vana telin a champion nghal a, a hnuah lightheavy-ah insawnin, kum 2019 thlengin Pro Fight-ah a inlan a, a bi tum hneh vekin vawinga a zawnin a champion.
Indian Army Sports Institute, Pune-ah sipai boxer ve bawk Mala a inkulh ve thung a, Mizoramah hneh theih loh ang maia Vana a vawklallen avangin hmachhawn ngei a duh.
Electric Veng, Lunglei boxer Mala hian 2022 National Games middleweight-ah Mizoram tan silver medal a hnekchhuak tawh a, Mizo mipui hriat hlawh lehzual turin a theihna phochhuah ngei a tum a ni.
Fight Night-ah inhnek vawiruk a awm dawn a, bantamweight-ah round ruk awh turin Laldinsanga leh Ramdinthara, round li turin welter-ah Lalruatzela Hauzel leh Lalmuanpuia, super fly-ah Vanlalenkawltira leh Lalrinngheta an innuai ang.
Round thum turin light fly-ah Emmanuel Vanlalthlengliana leh Benjamin Lalrindika bakah Khelo India State Centres of Excellence hnuaia inzir lai L. Joseph Buihringpachha leh H. Zomuanpuia an inhnek ang. Thlirlawkna Inrinni zan dar 8 khan LPS 1-ah tihchhuah a ni tawh a, nizan dar 8-ah thlir lawkna dang tihchhuah chhunzawm a ni bawk.
LPS Fight Night: Inhnek hmuhnawm ‘show’ duh Vana
