Nimin, Thawhlehni khan LPS Huan, Falkland Vengah an hriselna endik hmasak a ni a, tel tuma form thehlut boxer 395 atangin fly-ah 107 an tel dawn a, weight hrang panga zinga an tamna ber niin, bantam-ah boxer 61, light-ah 59, welter-ah 40 leh middle-ah boxer 14-in champion nih an inchuh ang.
September ni 30, Inrinniah LPS Office, Zarkawtah fixture tarchhuah a ni dawn a, October ni 2, karleh Thawhtanni zanah LPS Arena, Falkland Vengah inhnek tan a ni tawh ang.
Nikum khan weight hrang pangaah boxer 211 an chhuak a, kuminah 72-in tel an tam zawk a, chutih laiin middleweight-ah boxer 16 an tel tlin loh avangin semi-final lut chin hnenah chauh lawmman pawisa fai hlan a ni ang.
Fly-ah champion kawnghren lakkir leh tumin Pro Fight-a vawinga champion tawh NT Lalbiakkima a inbuk a, nikuma final lut Samuel Lalthlamuana, semi-final lut Gregor Joseph leh C. Zosangmawia bakah boxer beiseiawm Hming-thanmawia, Lalmuankima leh Donovan Lalremmawiate an tel dawn a, anni bakah hian a vawisarihna’n kum 41 mi John Lalhruaisanga a tel dawn a, a khelh tawhah a hnekpui tur a inlan loh avangin vawikhat a chak tawh a ni.
Fly champion lai leh nikuma best boxer Laldinsanga’n bantam title a chuh ve thung dawn a; tunlaia hmasawn tak Omega Lalramdina leh nikuma semi-final lut David Laldanmawiate nen an awmho a; kum 60 mi Jonathan Hmar, Vanbawng pawh kum 2017 hnua a vawikhatna’n a inbuk ve leh a ni. Light champion lai Vanlalawmpuia a tel lo a; bantam champion lai Lalrin-ngheta’n a khelh thinna kalsanin light title a chuh ve thung dawn a; nikuma final lut leh kum 2015 bantam champion HC Lalramfela nen awmdunin, Pro Fight-a hriat hlawh tawh Lalremsanga leh J. Lalhruaitluanga an inbuk bawk.
Champion lai C. Lalhruaitluanga’n welterweight kalsanin middle-ah chona thar a hmachhawn dawn a, nikuma semi-final lut Lalruatzela Hauzel tan welter title beiseina a san phah a; sipai boxer Justine Renthei, National School Games-a champion tawh Van-lalruatpuia leh tawnhriat nei Zo-nunzirate nen an awmho a; tunlaia boruak nei tak kum 50 mi Zomuanpuia Tlau, Kolasib bakah a vawikhatna’n Bill Gates a tel dawn.
Middle-ah welterweight champion Hruaia a langsar a; Mizoram Fight Night champion F. Lalthanliana Junior, Khelo India Youth-a tel tawh Vanlalhuala leh Mizoram Fight Night-a semi-final lut Daniel Beipasasa-te nen title an inchuh dawn a ni.
LPS Pro Fight-a inlan tur boxer 282
