LUHCHILH POLICY

Rev Dr Ramengliana
Krismas boruak a lo zo a, kum thar kan chuangkai fel a, kan rilrua awm tura ka duh pakhat chu ‘luhchilh policy’ hi a ni. Krismas tawngkam lar tak Isua hming pakhat Emmanuela tih hi a lo pian huna a hming atana zawlnei Isaian a lo hrilhlawk tawh, hming ropui leh awmze thuk tak keng tel a ni a (Isaia 7:14). Mi tam takin hre sual hretin ‘Kan hnenah Pathian a awm,’ tihna emaw kan ti palh thin. A awmze dik zawk chu ‘Kan hnena Pathian awm’ tihna a ni. Thuthlung Hluia hmuh phak loh Pathian, ban phak loh Pathian, hriat har tak Pathian kha tunah chuan kan zingah chengin, kan nih ang ni ve tura min luhchilhin ‘Kan hnena Pathian awm’ a lo ni ta. Tunlai tawnga sawi chuan ‘Pathian ‘Cial’ a ni ta a nih chu. Kan rin thu mai mai pathian ni lo, kan suangtuahna thil mai ni lo, kan mita kan hmuh leh kan kuta kan khawih Pathian ngat a ni ta si. Emmanuel tih chuan luhchilh a kawk a, a awmze lehlam chu ‘luhchilhtupa’ tih hial mawi a ni.
Luhchilh ngai mihring
Eden huana mihring suala tlukna kha kan ngaih tluangtlam mai aiin a lian a. Kha thil avang khan hringfa pumpui chuan Isua tel lovin kan nihna hmasa kan pha thei ngai ta lo a ni. Kan thianghlimna kan hloh tawh avangin kan duhzawng te pawh Pathian ngaihah a herh zo vek tawh a. Accident tawh avanga kebaiin a duhna hmun ngei ngeiah pawh a kal thei tawh lo anga tha duh ngawih ngawih tha thei ta lo ni lovin, vawkin khum nuam leh rimtui aia chirhdup hmun chu nuam a tihna zawk a nih miau avanga a pan thin ang hian sualna chuan kan duhnaah hna a thawk tawh a ni.
Nuna Pathian dah hmasa ber a, mahni vengte dah pawimawha mahni inngaipawimawh lo ber tur khan mahni kan indah hmasa larh a, a tul angin vengte kan ngai pawimawh ve leh a, Pathian phei chu kan dah pawnlang hle. Chu chu mihring sual rilru nihphung a lo ni ta. Sualna hian Pathian duh loh zawngin mihring a chettir a ni mai lo va, mihringin Pathian a do a, a bei tihna a ni tih hi hmuh phak loh a awl khawp mai. Lal fapa Absaloman a pa Davida duh loh zawng a ti a, a pa a lawm lo hle tih ni lovin Absaloma khan a pa lalna chhuhsak tumin a do a, thah chimih a tum hial a nih kha. Khami dinhmun kha Pathian leh mihring inkar chu a ni. Awm dun thei kan ni lo.
Luhchilhtu Pathian Fapa
Pathian hian ama chanpual tur hnam din a tum nasa hle mai. Bible History kan en hian chu chu a lang ut mai a ni. Eden huanah khan a han awmtir phawt a, dan 3 (tih tur 2 leh tih loh tur 1) a han pe a, mihring chuan an zo ta lo a nih kha. Kanan ram, khawizu leh hnute tui luanna ramah a hruai lut leh a, Thusawm pek, dan tesep 600+ leh lal, zawlnei, puithiam a pe vek. Chutah pawh chuan mihring chuan a zo leh ta lo a ni tih kan hria. Tichuan, Pathian Fapa chuan a luha luhchilh turin hma a la ta. He Pathian mihringa chang hi ‘luhchilh’ rawngbawlna a ni a. Pathian chu Pathian hla ni lovin, kan hnena Pathian awm’ a lo ni ta.
Chu Emmanuela chuan mihringte chu a chin chhuakin a luhchilh a, a rawn awmpui ta a. An harsatna, an natna, an hahna, an buaina zawng zawng, thihna thlenga luhchilha hneh vekin an chhandamna a thawk chhuak ta a ni. Mihring tak a nih avangin mihring tuar ang a tuar a, thlemna zawng zawng pawh a tawng a, sual erawh chu a sual ve lo a nih kha. Krawsah luhchilhin Pathian leh mihring inkara dingin Pathian thinurna chu ban pharin a mite aiawhin a dawng a; amah ringtute chu thinlung thar a pe a, chatuan inah a hruai lut dawn a ni. ‘Kan hnena Pathian awm’ chu mihring a nih avangin Pathian laka mihring bat chu mihring a nih angin a tlak thei a, Pathian famkim a nih bawk avangin a tlak zo zan bawk a ni. Chu Emmanuela hmelah chuan Pathian ropuina kan hmu a ni.
Policy lian
Krista Isuaa Pathian thiltum hi a pui em avang hian kan man pha lo tep tep thin a. Kan Pathianin a ringtute tana a ‘plan’ hi pui rep rep tak a ni. Kan sawi phak leh tuipui chin hi chu vanram kan kai theih nana min rawn chhandam hi a ni a. Hei hi a nep hauh loh lai hian hetianga kan ngaihtuah pangngai ang mai mai chu a ni lo a ni. Amaha rochan nei ve ngei a, amah nena chatuan inkungkaihna tha siam, chatuana hmangaihna min chentir a tum a ni tih hi hria ila. Thupuan buah phei hi chuan a kohhrante chu a Fapa nupui tur angin a sawi daih mai! A sang thei ang ber leh a mawi thei ang ber nihna a pe a ni e. Chu chu ringtute chatuan lawmna tur leh hlimna tur a ni. Trinity chatuan chatuana tu dang ngai lova hlim leh lawma inhmangaih tawnna an chen ang dinhmunah khan min luhpui a tum a ni ngei ang.
A thih hma khan kan Lalpa Isua khan a zirtirte awmpui turin Paraclete a lo kal tur thu a sawi a. Paraclete chu ‘thlamuantu dang’ tihna mai a ni a. Isua kha a thih tawh dawn avangin a zirtirte kha a awmpui thei reng dawn lo va, thlamuantu dang paraclete ‘Thlarau Thianghlim’ chu an mamawh dawn a ni. Chu chu hriain Thlamuantu dang a rawn thleng a ni reng a. Pentikos-ah khan chu Thlarau Thianghlim chu chatuana ringtute awmpui turin a rawn thleng ta. Isua thawhleh hnu khan a taksa kha a thawhpui a, vanah a kalpui daih mai te khan awmzia a nei thuk hle. Kha taksa, mihringte taksa ang (van taksaa tihdanglam ni mah se) kha vanah a luhpui a, kan hnena Pathian awm a nihna chu vanah pawh a pu lut zel a ni ber awm e.
He luhchilh policy-ah hian Pathian hmangaihna nasatzia kan hmu a, amah ringtute rawngbawl dan tur kan hmu bawk. He policy lo hi chu policy han rintlak tak tak a awm meuh lo tih theih a ni. Thlarau ramah phei chuan a awm lo a niang. Chhan chhuah ngaite awmna hmuna zin emaw, zu tlawh ve pangngai emaw, ral atanga ngaihsak chauh a tawk lo, luhchilh a ngai. He luhchilhnaah hian an nih ang nihpui thiam, an tuar ang tuarpui leh an rilru ngaihtuahna zu hriatthiam sak a, an harsatna lai taka zu awm ve a kawk a ni. Chu tak chu Pathian Fapain a tih a ni a, chu tak chu kawng engkima kan entawn tur chu a ni awm e.