Phulpui leh Baktawng ram inkara Tuirial lui chu mi tu tih hriat loh ten turin an hrai a, lui sa thahnem takin an thih phah a, a titu chhuichhuak a, hremna pek an nih theihna’n police-ah FIR thehluh tum a ni.
Lui hrai a nih chungchangah hian Mizoram lui humhalh duha pawl din, Save Mizoram Rivers (SMR) chuan Inrinni khan Muallungthu VC leh Aibawk Range Officer (EF&CC) te nen a hmunah an enfiah a. Lui hraina hmun hi Phulpui ram leh Baktawng Theihai ram inkara luang, Muallungthu lam atanga kal chuan Tuirivang penga kalin, Tuirivang lui kan hnuah Tuirial kai (Zawnte-a kai) hnar lam km.3 vel, ‘Suar Chhe Hmun’ an tih atanga hrai tan nia a lan thu an sawi.
Lui hrai hun hi hriatchian theih ni lo mah se, January 21 zinga hriatchhuah a nih avangin, January 20 tlai/ zan vel a nih rin a ni.
Lui hraitu nia hriatte riahbuk bulah bleaching powder bag ruak pali leh chinai bag hnih hmuh a ni tih SMR hruaitute chuan an sawi a. Lui an vuak tanna hmunah hian bleaching powder leh chinai ek chhia hmuh tur a tam hle tih sawiin, bag ruak bakah chinai leh bleaching powder nawi hi bottle-ah thunin, a tul anga evidence-a hman turin lak a ni tih an sawi.
Lui hraina mawng lam, km.1 vel thleng luisa thi hmuh tur a awm a. A hmu hmasatute sawi dan chuan, an hmuh chhuah ni – January 21 hian hemi huamchhungah hian nungcha che zeuh pawh hmuh tur a awm lo a ni.
Luikama thlam nghak ho chuan January 21 zan hian a theih ang ang chawhmeh atan an chhar ve a, hemi tlai lam hi chuan heng luisa thi te hi a rimchhiat (uih) tawh avangin chhar tlak a ni tawh lo tih an sawi a. Helai hmuna huan nei ho chu lui hrai a nih avang hian an thinrim ve hle tih SMR hruaitute hian an sawi a ni.
SMR hruaitute sawi danin:
# A hmuna endiknaah lui hraina hmun atanga metre 200 vel chinah chakai thi hmuh tur a tam a. Hemi chinah hi chuan tunah pawh luisa hmuh mai tur an la awm lo.
# Metre 250- 500 chinah chakai thi hmuh tur an vang a; kaikuang thi an la tam a. Nghalim leh lengphar note dam hmuh tur an awm loa, tlema lian deuh tawh hmuh tur tlem an awm.
# Metre 500-1000 chinah kaikuang thi an tam tawh lem lo. Chakai thi hmuh tur a awm tawh loa, a mawnglamah lengphar leh nghalim note keu hlim dam lai hmuh tur tlem an awm.
# Sangha thi hi km.1 chhungah chuan a awm chho vek a. A lian thi hmuh tur a awm lo a, a lian pawl pawh kutzungtang tiat lek lek an ni.