Tunlai hian lui tui humhalh duhna thalaite thinlungah a thawk nasa a, Aizawl bakah Mizoram hmun dangah pawl leh mimal thahnemngaite an chechhuak mek.
District Urban Development Office Kolasib leh Govt C. Zakhuma Higher Secondary School Eco Club tangdun huaihawtin Nilaini khan Kolasibah ‘Project: Waste Free Kolasib’ khuhhawn a ni a. Govt. CZ HSS Eco Club hian Kolasib tui lakna Tuichhuahen fintu, Tuilut lui hnar an thianfai nghal.
‘Project: Waste Free Kolasib’ khuhhawngtu, district bawrhsap John LT Sanga chuan CZ HSS Eco Club hmalakna hian Kolasib khawpui faina kawngah, vengchhung, mimal faina lama kan inenkawlnaah thu ropui tak a sawi a ring tih a sawi a. Zirlaite leh zirtirtuten office pawimawh tak nena thawk hoa, khawtlang tihfai hna, kan tui in tur hnar tihfai hna thawk tura an pen chhuak chu thangkhawk ring tak a siam zel a beisei tih a sawi a ni.
Govt. CZ HSS hian nikum khan Tuichhuahen fintu lui hnar thenfai hna hi an lo thawk tawh a. Bawlhhlawh bag 100 an paih. Kuminah a aia nasa zawka hma lak tumin Eco Club-in ruahmanna an siam a. An ruahman dan chuan bawlhhlawh hi bag 200-a khung theih tal thenfai an tum. School naupang 150 vel bakah zirtirtu mi 20 an thawk chhuak a ni.
Hetihlai hian kar kalta khan Champhai rawlthar pali chuan inthurualin Keilungliah fintu tui kawng an thianfai.
Champhai Vengsanga Govt. Gandhi Memorial Higher Secondary School thlang atanga tanin tui luankawr an thianfai tan a, bawlhhlawh chi hrang hrang – plastic bottle, thawmhnaw leh diaper thlengin thenfai tur a tam hle tih an sawi. Bawlhhlawh hi a vaiin ip 20 chuang an chhar khawm a ni.
Heng rawlthar palite hi – Remsangzula, Vanlalhmangaihrenga leh Isak Zomuanpuia, Champhai Venglai ami vek leh Zodinsanga, Champhai Bethel te an ni.
Lui humhalhin thalai thawkchhuak
