Luia oil chhia paih vang nia hriatin Tuirini lui tui chu dum nguk khawpin oil-in a chiah a, he thilah hian a titu zawng chhuaka dan anga hma la turin police leh Pollution Control Board ngen an ni.
The Aizawl Post thudawn danin, December 4/5 khan Tuirini lui fintu Sathangluiah oil chhia hi leihbuak niin a lang a, an leihbuakna hi Sathanglui hnar, Seling leh Keifang inkara lei thlang lam nia ngaih a ni. Helai hi kawng laih zau leh siamthat hna thawhna lai a ni a, kawng laitu contractor-te thiltih nia ring an awm.
Tunhnaiah oil chhia hi luiah hian an lo paih tawh a, Sathanglui hi kawng laih leivungin a hnawh khah vek avang leh oil paih hi a tam tham loh deuh avangin Tuirini hi a lut lo mai zawk niin thudawnna chuan a sawi.
Mita hmutute sawi danin, oil an paihna atanga km.2 chuang chhung Tuirini lui hi a dum nguk thei a, a mawm thang zul mai niin an sawi. Sangha leh lui sa dangin an tawrh dan hi hriatchian a la ni loa, Nilaini chawhnu lama an enchian chinah lui sa thi langchhuak hmuh tur an awm rih lo a ni.
December 6 khan Centre for Environment and Justice chuan Seling Police Outpost-ah FIR an thehlut a. He thil hi luia nungcha leh lui tui tlantu mihringte tana thil pawi tak a nih avangin a rang thei ang bera hma la tura ngenna thu an thlen. Mizoram Pollution Control Board hnenah pawh a rang thei ang bera enfiaha dan anga hma la turin an ngen a ni.
Luia oil chhia paih vangin FIR thehlut
![](https://theaizawlpost.org/wp-content/uploads/1-242-768x1024.jpg)