Lula an multipolar world pawimawh zel ti

Brazilian President Luiz Inacio Lula da Silva chuan meeting pawimawh tak G-20 ang te Brazil co-founder a nihna ni bawk te chu multipolar world pawimawhna lantirna a ni tiin a sawi.
President Lula chuan biofuel alliance chu Brazil-in hun rei tak a ngiat tawh a ni ti bawkin, “G20 a thil thleng chu a thlen nana sum sen aiin a pawimawh zawk. Global biofuel alliance chu hmalakna pawimawh a ni a, India-in sum a invest a, sum a seng lo kan ti thei ang,” tiin a sawi.
September 9 khan India chuan Global Biofuel Alliance din a nih thu puangin G-20 ram te chu he hmalakna petrol leh ethanol chawhpawlha hmanna kalpui turin a ngen a. He Alliance hi Modi chuan global leader dang U.S. President Joe Biden, Lula, Bangladesh Prime Minister Sheikh Hasina leh Italian Prime Minister Giorgia Meloni te nen tlangzarh hona an nei a.
“PM Modi leh President Biden an tel ve hian min ti lawm a ni,” tiin Lula chuan a sawi a.
Lula chuan Brazil tan G-20 president nihna chelh tak chu chona nasa tak tiin a sawi a. “Intluktlanlohna chungchang chu ngaih pawimawh berah kan nei dawn a: inequality of gender, race, education, health, poverty leh hunger. Khawvel hian inbuktawk a mamawh a ni,” tiin a sawi.
September 10 khan PM Modi chuan Lula hnenah cerominal gavel chu hlanna neiin tichuan G-20 president nihna chu Brazil-in a chelh tan ta a ni.
Lula chuan kan ngaih pawimawh em em dang chu multilateral instiutions : World Bank, UNSC te siam that niin UN top body te kan siamthat ngei ngei a ngai tiin a sawi bawk a.
“Eng vangin nge khawvel mipui 130 million te riltama an awm?” tia zawhna siamin, “Growth awm theih nan kan pen a ngai a, chutih rual chuan fel taka tih pawh a ngai a, a nih loh chuan GDP growth chu mi tlemte te kutah a awm mai dawn a ni. Dik leh fel taka thil a awm chuan lungawilohna te a tlem ang a, riltamna leh retheihna te a tlem ang” tiin a sawi bawk a. African debt $800 billion vel chu infrastructure din nan leh retheihna umbo theih nan public works programme-ah chhuah ni se, tiin a sawi bawk.
Ka tum chu Brazil chu geopolitical map a rin luh leh niin khavwela intluktlanlohna te aupui a ni ang, tiin President Lula chuan a sawi bawk a.
“Brazil mipuite chuan event tha tak kan huaihawt ang a. Brazilian city a tam thei ang bera hman kan tum ang a, civil society nawlpuiah G-20 lar thei ang bera siam kan tum ang a. Democratic zual G-20 kan duh a ni,” tiin a sawi bawk.
Nakuma G-20 summit South American rama neihah Russian President Putin-an tel a tum chuan man leh man loh tur thu hla chu Brazil judiciary thutlukna siam tur a ni, tiin Lula chuan a sawi bawk a. “Putin an tel ve a duh a nih chuan ka sorkar ni lovin judiciary zawk a ni thutlukna siamtu tur zawk ni,” tiin Lula chuan a sawi.
Brazilian President chuan India a summit neihnaah Chinese President Xi Jinping leh Putin an tel lo dawn tih a hre lawk lo hrim hrim tiin a sawi bawk a. “Nakumah Rio-ah an lokal ka beisei a, Ukraine indona pawh a awm tawh loh ka beisei,” tiin a sawi bawk.
Lula chuan G-20 ah chuan BRICS leh G-7 ram tinte an tel vek thu sawiin pawl pahnih te umbrella organisation a ni zawk tiin a sawi bawk a. Multilateral system chu thlak a ngai a, chumi atan chuan G-20 kan tanrual a ngai a ni tiin a sawi bawk a.
“Community of Latin American and Caribbean States (CELAC) ram te chu G20 ah an tel tawh a, chutiang bawkin Brazil, Argentina leh Mexico te pawh an tel a. African Union tel ve lehin group dang te pawh an lo la tel mai thei,” tiin a sawi bawk.
Lula chuan Brazil chuan Organization of the Petroleum Exporting Countries (OPEC) a zawm dawn loh thu a puang chiang bawk.
African Union chu September 9, 2023 khan G-20 full member atan lakluh a ni a. Indian PM Modi chuan African Union tel ve chuan G-20 theihna a tisang dawn tiin a sawi a. EU hnua bloc anga G-20 zawm leh hmasa ber chu African Union a ni ta bawk.
Brazil hian kum khat chhung atan G-20 president nihna chelh ta in nakuma summit pawh a thleng zui ang a. G-20 president nihna hi kum tina inchelh chhawk niin president ni lai ram chuan a president laiin thuneihna sang tak a nei a ni.
Brazil president Lula hi left-wing niin tun hnai lawka Brazil president thlanna neihah chakna a chang a. Tun hma pawh a president lo ni reng tawh niin a chawlh hnuah thubuai te siamsak niin lung in-ah te pawh khungin a awm hial hman a. Lung in atanga a chhuah hnuah president candiate niin president tanglai Bolsonaro chu hneh zuiin Brazil ah thuneihna a chang leh zui a ni.